I Zopau a khuasuak zodiam? ~ Mungpi Khupson

Tuhunin leitungah pau nam tuamtuam 6000 kiim om dingin ki-ummawh a, hih teng ii langkhat pen tuzawh kum 100 khit ciang mangthang ding hi kici hi. Pau kia bek mangthangloin ngeina, zia le tong te tawh mangthang khawm ding hih tuak lai hi.

Babel tausang a kilam zawh leitungah pau nam tuamtuam tampi hong piang cih I thei a, tuhun ciangin a hih leh ahang tuamtuam tawh kiamlam hong manawh kik ta hi. UNESCO in a genna ah kalkhat halta-in pau nam khatta si den hi cizen hi. Ei minam tawmcik nam lianzawte kala teeng Zomite adingin hong patauh huai mahmah mawk hi.

Linguistic survey, Sorosoro website in pau tawh kisai a patauhhuaizia hi danin na lak hi:

Pau nam 500 pen a zang mi 100 ciatta khawngbek om hi.
Pau nungta lai khempeuh lakpana 96% pen leitungbup mihing 4% bek in zang hi. Leitungbup pau nam 6000 khawng lakpana 5760 pen leitungbup milip seh za suah seh li bek in zang cihna hi!
Internet sunga lai kigelh khempeuh lakpana 90% pen pau nam 12 bek tawh kigelh hi.
UNESCO in pau tuamtuam dinmun patauhhuai dan (degree of endangerment) hih bangin na khen hi.

A patauhhuaina dinmun – (Grade) – Patauhhuai lo

Patauhhuai lo – (5) – Naupang, nu le pa leh khanghamten first language(pauzatpi pen) in zang ciat uh hi. Khang kizomin kizang paisuaka, kiim le pam lakpan a nawngkaisakzo ding omlo hi.

Patauhhuai pianpian – (4) – Nu le pa leh khanghamten zang ciat uh a, a naupang tamzawte un a zat laitakun pawlkhat ten 1st language adingin zanglo uh hi.

Patauhhuai – (3) – Pianpih pau(mother tongue) pen innsungah kilimzat nawnlo hi. Nu le pa leh khanghamzaw deuh teng bek in zang uh a, naupangten thudon lo hi, a kihopih hangun pau dangkhat peuh tawh dawng uh hi.

Patauhhuai mahmah – (2) – Nu le paten thei tei napi zang nawnlo. Nupa kihona-in kizanglo, khangham piteek piteekte bek in zang uh hi. Naupangten zaban nawnlo hi.

Patauhhuai pha mahmah – (1) – Pisawn pusawn (great grandparent) te bek in thei uh a, kuama’n zang nawnlo hi.

Mangthang khin – (0) – A zang, a thei kuamah om nawnlo.

Pau nungta laikhempeuh lakpan 60% – 80% pen Grade 4,3,2,1 te ah om kici hi. I Zopau koi munah om peuhmah hiam ngaihsun pha dih ni.

1826 kumin Breton pau pen Europe ah mihing million val in zang napi, tuhun ciangin, mi 200,000 khawng bek in zang lai uh a, tua a zanglaite lakpan a tamzaw pen kum 60 val hi sawnsawn mawk uh hi. Zomite lakah Zopau(pianpih pau) a zangzang lai teng kuakua hiam, nute pate leh khanghamte bek hiam, naupangten zang maw zanglo kisittel huai hi.

Linguistic misiam Michael E. Krauss in a genna ah naupangten pau zatpipena (first language) a neih uh paubabeltower khat peuhpeuh pen mi 100 bek in a zang phial zong patauhhuailo hi na ci hi. Ahi zongin pau khat peuhpeuh a zang tul za tampi a pha phial zongin naupangten first language in a neih kei vua leh patauhhuai mahmah hi na ci leuleu hi. A kithehthang Zomite, i teenna mun peuhpeuhah I tate in I pau a zat ziahziah theih peuhleh tuzawh kum 100 sunga a mangthang ding pau 3000 lakah I Zopau kihello ding hi cih phawk ni.

Pau a mangsak thei pawlkhat en dih ni:
I) Globalization: Khua khat ah pau tampi kithei mah leh pautaang dingin khat bek kizang thei a, tua pautaang pen hausa pa’ pauzat a hihi. Tuamah bangin tuhun leitung khantohna tuamtuam hang tawh sak le khang, sim le mal a om gam tuamtuamte pen khuakhat(globalized) dan hong suak ta a, gam thahatzawte pau sin loh, zat loh hong phamawh ta hi.

II) Nek le taak zonna: I teenna khua ah nuamsa-in hau ciat lehang gam dangah sum thalawhin I kuan peuhmah kei ding hi. Ahi zongin I cimawh zawngkhal manin singta gam leiah nuntakna zongin i kithehthang a, I tuna ciatte pau le ham sin loh zat loh hong phamawh hi.

III) Kumpi gina lo : A diakin Kawlgam sung en lehang zumkong mangkong ah kawlpau bek saang uh a, Zogam nangawnah Zokam kizang theilo mawk hi. Sanginn te ah Zopau gina-in kisin thei lo a, kawllai bek tawh pilna kisin thei mawk hi. Zogam khua tuamtuamte ah kawllai kisuang zihziahin kumpi thu kizaktuahna kawllai bek hong hi ta ahih manin sin loh zatloh hong phamawh hi. Myanmar ah Tedim pau tan (class) bangzah ciangah kisin thei hiam ka tel keia, India ah Lusei pau tawh Master degree kila thei ta hi.

IV) Biakna leh kipawlna: Mizogam eimite khua pawlkhatah eimi vive teeng napi lusei pau tawh biakna pia tangtang se uh hi. Mizoram Synod in ukcip hi. Namdangte kipawlna ah I va kihel ciangin amau pau bekbek kizang pah hi.

V) Multimedia : Music, Video, TV, Internet te hangin khangthakten amau pianpih pau nusia hiaihiai-in namdang pau, zia le tong zil uh hi. Zatdan siam ding kisam mahmah hi.

VI) Zahpih : Mi’ hong simmawh khak ding lauh manin khangthak tampiten pianpih pau zang ngamlo mawk uh hi. Hih pen I hai man hi, pau tuamtuam theihna in pilna hi a, pianpih pau theihlohna in haina hi cih phawkkik ni. I kisaktheih pih pukpuk kei phial zongin zahpih kei beek lehang phadawm ding hi!

VII) Kholhpih lawm : Zomite pen namdang tawh kithuah peuh leng amau pau uh kizui pah hamtang mawk hi. Tua ahih manin I mipih I sa pihte a tam theithei kholhpih sawm ni. Internet panin chat pih ding namdang lawm vive nei mawk leng Zopau zatna ding hun omlo ding hi.

A hang tampi om theilai in teh, bangbang hita leh I ZATLOH man bekin a mangthang hi cih phawk ni. Zokam i zatlohna hang bang hiam kidong ciat ni.

I Zopau kepcin dan ding pawlkhat enkik leng:
I) Innkuan : Koi mun koi gamah om ta leng I innkuansung pen kuaman ong saipih theih hilo hi. Nu le paten tate tungah a thu neihna mun ahih manin tate inntuan ma loh pen nu le pate zia le tong, pau le ham a zuih ding uh ngeina ahi hi. Tua ahih manin innkuan sung pen I pau kepbitna dinga institution hoih penpen ahi hi. Mizogam pana khangkhia ka hih hangin ka nu leh pa in Lusei pau tawh khatvei beek zong hong hopih ka za ngei kei hi. Zopau ngiat tawh hong hopih den uh ahih manin ka pianpih pau a zangthei suak ka hi hi. Nu le pa tawh bek hi lo, sanggam u leh nau tawh kihopihna dongah I tate Zokam zangsak ciatciat leng hoihzaw kan lai ding hi. Na tate Zopau tawh na hopih ciang pau dang tawh hong dawn peuhmah leh Zopau tawh hong dawnna dingin hanthawn pah in tua hi kei leh hong zekai kha ding hi.

Pau lam asin misiamten bang gen hiam cih leh mi khat in pau nam thum le li ciangciang khawng a theih dinguh pen haksa lo hi na ci uh hi. European ten a tangpi-in pau nam 3-4 thei uh kici hi, Malaysia bang zong nam tuamtuam teenna hi a, innkuansungah amau pau ciat zang uh a, namdang tawh a kiho bek uh teh Malay/ English zang pan uh hi. Kuama’n a pianpih pau uh zahpihlo hi. Zangkong, Aizawl, Delhi, Tulsa pana khangkhia naupang khat in Kawlpau, Mizo pau, Kala pau, Mikang paute a omna ciat uh tawh kizui-in sinsak kul kiuhkeuhloin hong siampah lel ding uh hi. Nang sinsak ding pen ama pianpih pau, nangma’ pau bek mah ahi hi.

II) Pawlpi : Pianpih pau tawh phatna leh biakpiakna piak sanga kilawmzaw dang om lo hi. Koi mun koi gamah i om zongin Zokam kizatna pawlpi ah om sawm ciat ni. A diakin naupang nipi sang pen I zatsiam ding kisam sa ing. Sangmangten gupkhiatna thu hong puak laitakun Zolai zong hong sinsak uh hi, tua hong sinsak Zolai pen I Naupang Nipi sangte(Sunday school) ah sinto suak sak leng a poina om diam, khangthakten Zolai gelh theikim pah ding uh hiven!

III) La leh Video : La in minam hong itsakzo mawk hi veh aw. Thawnkham late, Pauno late leh Zomi lasiam dangte lasak zak ciangin I lungsimah minam itna hong thaksuah zel hi. Laphuak siam, lasa siam leh promoter hong kithuahkhop uh ciangin Album picing zo bek ahih manin la lamah I khantohna dingin tha kipiaktuah zawh ding thupi mahmah hi.

Korean movies in Asian mite lungsim a zawh dan I theihsa hi. KL ah Pau nam tuamtuam sinna CD kum khat ka zuak sungin, Korea pau tam ka khawng pen hi. Malay leh Chinese te nangawngin siam nuam mahmah tazen uh hi veh aw. Pakistan ten India mudah mahmah ta leh Bollywood flim et a khawl thei tuan kei ve vuale! Hollywood bel gendah vet ni! Video zang siam peuh leng I khangnote cih thadah I kiim I paam namdangte nangawnin Zopau hong sinnuam ding uh hi ei! Gamkeek dan namkhat bek omlo hi cih phawk ni. Tuaciangin flim hoih tuamtuamte pen Zopau subtitle koihzawh ciatciat sawm leng hoih ding hi.

IV) Internet : Nidang, Zolai pen Lai Siangtho leh pawlpi thukizakna cihloh buang sim ding om mello hi. Tuhun ciang ahih leh thuthak, thului leh a dang tuamtuam Zolai tawh sim theih ding internet ah om zihziah ta hi. Laigelhsiam ten blog hong nei ziahziah henla, Zonet, Tongsan, Vaphual, Zomidaily leh a tuamtuamte hong zuun ziahziah lai leh nakpi’n I khantohpih ding hi. Facebook panin Zomi group zong hunkhop om khinzo a, post leh comment tuamtuamte Zolai mah tawh gelh tangtang den zo leng I Zolai hong khangto semsem ding hi. Youtube panin I misiamte thugenna I ngai ziahziah thei ta a, I nasepna mun nangawn panin I kikhawm thei ta hi. Internet pen zang siam peuh leng I pau khansakna dinga vanzat hoih mahmah ahih laitak, I zat siam kei leh hong netum ding hi cih phawk ni.

V) Thukizakna leh laibu : Zomite pen lai sim lamah citak zolo hi hang, Aizawl na pai leh na mu dinga, Mizo nupi papi, piteek puteek ten a omna mun peuhpeuh vuah thukizakna leh laibu khat peuhpeuh sim tangtang zo uh hi veh aw. Tuahang mahin a literature uh zong vaampah hi. Kumsimin laibu tul val suaksakzo den uh cih I phawkkha hiam.

Picing sim ding bekbek buaipih loin, Naupangte leh khangnote simnop ding lamsang laibu tampi I neih kisam hi. Tuaciang laibu hoih, laibu minthangte a tam theithei Zokam tawh tei-in a a bu tawh suaksak pahpah leng Zolai leh Zopau vaam semsem ding hi.

VI) Khoppi le pawi: Crusade a kipan Khuado pawi dongin, kimuhkhopna pawi neizo den leng hoih ding hi. Thugen siamten thu hong gen dinga, lasa siamten la hongsa ziahziahin, mipi in lapi I awi ziahziah dinga, Zokam vive kizang ding hi.

VII) Radio : Radio pan programme tam theithei I ngah zawh ding thupi hi. Zokam tawh thuthak, kamkupna, sermon, lasak tuamtuam ngaih ding om kinken zo leh Zopau hong paal ding hi. I omna mun ciat ah I pawlcin naak leh kumpi pan radio programme ngahzawhna ding nget pahpah huai hi.

I thukhupna dingin Chin State ah Tedim kam tawh Lai Siangtho kitei masa pen a, Chin State census 2008 en leng Tedim ah miteeng tampen hi. Hih State ah Tedim pau zang tampen kha ding hi. Wikipedia ah bangci kigelh hiam cih leh Zo suan nam tuamtuamte pauzat 50 kiimlak pan Lusei(Mizo) zomah Tedim(Zokam) zang tampen ding hi; million lang val in zang hi na ci hi. Minam neu hi kei hang; a ihmu, a khanglo nailo hi bek hang. I omna ciat panin Zokam tamzat semsem ni, tua hi leh I Zopau khuasuakzo ding hi.

Mungpi Khupson