I kisap pen ~ David Tuang

I kisap pen ~ David Tuang

Hun khat lai-in khuaneu khat ah, tangval no khat in, bang hih leng ka lungkimpen dinga, bangci bangin om leng ka lungnuampen ding hiam, cih ngaihsun ahih manin, lungkim nading leh lungnop nading zon’ hong kipan hi. Ni khat, a khua panun khuapi sungah nasep zong dingin hong kuankhia a, nasep hoih mahmah khat hong ngah hi. Nasep zong hanciam mahmah ahih manin sum tampipi ngah hi.

A citak a kuhkal mahmah khat ahih manin, sum tampipi khol zo a, a sawt loin Inn leh lo, taih inn mawtaw cihte hong nei zihziah a mihau khat hong suak ziau hi. Ama aituam in Company tampi nei-a, lawhcing mahmah hi. Nasem tampi nei-a, ama kum tawh kituak in a neih a lamh leh a hauhnate lungkimhuai mahmah hi. Ahi zongin a kicing mahmah a hauhnate tawh, lungkimna leh lungnopna neizo nai tuan lo ahih manin, a kisap khat hong mukhia leuleu a, tua in; angkawi ding zi ahi hi.

Ni khat, a nasemte sawl in nungak melhoih tampi kaikhawmsak a, tuate lak panin a zi dingin hoih a sakpenpen khat hong teel hi. Itna bulphuh loin, mel hoihna tawh zi ding teel kha ahih manin, nupa kikaal-ah ki-itna peeng mahmah a, kilem hun hong tawm mahmah hi. Inn leh lo sum leh paii, neih leh lamh-te kicing takin om himah ta leh tua inn sungah lungkimna leh lungnopna om theilo a, nisim in kitot kiselna leh lungkham mangbatna tawh hun bei den hi. Ama hauhna in lungnopna pia zolo a, a deihpenpen a teel a zi’ tungah zo lungkimna ngah zo tuan lo hi.

Ni khat, a lunggim a singimna teng vengsak dingin, amah guak gam sung munhoihnate ah tawlnga hithiat ning ci-in hong pai leh, mizawng nupa kop khat in kikawi kawm sa-in, lo a khawhkhop laitak uh hong mu kha citciat a, lamdangsa mahmah in lo nawl panin ensimsim hi. Tawlkhat a etsim khit ciangin, mizawng nupate kiangah vapai a, “Lo nawl panin sawtveipi kong ensim a, na ki-itnate uh ka mu khinzo hi. Bangci bangin hi bang itna nei thei-in, bang hangin hizah in lungnuam takin om thei na hi uh hiam?” ci-in dong hi.

Mizawng pa in, “Mihaupa aw, nang bangin ka hau kei uh a, ka zawng mahmah uh hi, na zi bangin ka zi a mel hoih lo a, kei zong nang bangin ka mel hoih lo hi, i nuntakzia zong ki lamdang mahmah a, ahi zongin i neih kilamdang hi ci hi. Nangh, leitung hauhna kicing takin na nei-a, zi melhoih mahmah zong na nei hi. Kote ka hih uh leh leitung hauhnate neilo napi-in, Na khempeuh kicin’na Jesu kanei uh hi,” ci-in hong dawngkik hi. Mihaupa in zong lamdangsa mahmah a, Jesu anei nuntakna hi bang himawk maw, ci-in dai takin tawlkhat sung hong lungngaih khit ciangin, nuntakna sungah a kisam pen hauhna leh zi melhoih peuh himasa loin, a kisappen Jesu ahih lamtak hong tel thei ta hi.

Eite’ nuntakna sungah zong a kisampen in, leitung hauhnate leh zi/numei melhoih theithei peuh i sa kha zel hi. Leitung leh a sunga om nate tawh lungkimna leh lungnopna i zonzon lai teng lungkimna leh lungnopna i mu ngei kei ding hi. Leitung hauhnate leh melhoihnate in nopna leh lungkimna hong piak theih loh banah, tuate hangin Jesu ki nei theilo a, ahi zongin Jesu i neihna hangin tua hauhnate leh zi hoih cihte zong kinei thei hi, cih i phawk gige ding kisam hi. Jesu sung bekah lungnopna taktak om a, lungkimna taktak zong tua Jesu bek mahin hong pia thei hi. I kisappen JESU bek hi. Khazih sungah, David Tuang