I deihna leh upna i genciang ~ Pau Khat Suan

I deihna leh upna i genciang ~ Pau Khat Suan

1990 kum in India ah pai in, Tapidaw nungzui thusinna tomno ( kha 6 ) ka kah ngei hi. Tua hun sung a kasin khak thu tampite’ lak ah thupi kasak leh ka nuntakpih gige thu pawlkhat om hi. Tuate’ lak ah..

• 1) LST simdan leh Pasian tawh kiho dan
• 2) Thu umlo biakna dangte kiang ah Pasian’ thu gen ciang a a kidop huai leh a muibun thei thu gendan…
• 3) Pasian’ deih, Pasian’ san’theih biakpiakna
• 4) Thu um mite kimakaihna leh kinungzuih dan
• 5) A picing makai leh nungzui hoih

cihte tudong ka nuntakpih thute ahi hi.

Hihte lak ah upna kibang lo, biakna kibanglote kiang ah thugen ciang a thugen zia ding cih pen Pasian’ thubek hilo, amun amual zui a leitung thu leh politics ah zong a kizang thei leh a zathuai mahmah zia khat kihel hi.

A rule pen hihdan ahi hi.

– Pasian’ thu umlo Biakna dangte kiang ah thu na gen ciang, amau’ upna leh a biak uh a pasian a manlohna tawh thu pan ngeilo ding.

– A upna uh leh a pasian gensiat sak lo ding

– Thu kinial lo ding. A thugen limtak ngaihsak ding. Khialhna zong leh kawk lo ding

– Nang Pasian leh nang upna, na lam-etna leh amah na deihsakna itna tawh gen ding

Hih zia pen i society leh i politics ah zangsiam hile hang khua sung, minam sung, politics cihte ah khat le khat kitelsiamna tawh cidam huai leh ki-itna, kilem kipumkhatna tawh khantoh lam ki manawh mahmah ding hi.

Midangte’ upna, ngaihsutna leh lam-etna phawkpih kawm in ei’ deihna, upna, ngaihsutna leh lam-etna ciat kigen kikum diamdiam in, a hoih pen ah a kisap leh a kikhel ding in kigingsa in omthei hile hang cihpen a picin vai, a pilvai leh nuntak gimnam zia hiding hi.

Tedim Chin maw? Zomi Chin?

• Tedim Chin = Tedim + Tonzang Zomi
• Falam Chin = Falam Zomi
• Hakha Chin = Hakha+Thatlang Zomi
• Matu Chin = Matu Zomi
• Mindat Chin = Mindat + Kanpalet Zomi
• Palewa Chin = Paletwa Zomi
• Asho Chin = Asho Zomi

*** Zomi = Chin ***

Chin pen Zomite’ tangthu lai a a kigelh a kipan ong kilawhna, minam dangte’ ong theihna hi a,…
“Zomi” pen ei le ei kilawhna hi in, namdangte’ ong lawhna hilo hi.

“Chin” a kicih ciang Zomite a gennuam hi a, “Zomi” icih ciang “Chin a kiciamteh minam bupi” a gennuam ihi hi.

Hih pen a buaihuai hetlo thu hi a, a lamdang hetlo min, kilawhna leh kiciaptehna ahi hi. Politicize nading bangmah omlo a, metna ding a omloh bang in supna ding zong bangmah omlo hi.

Gam le Nam it leh ngaina taktakte hih “Min leh kilawhna/kisapna” tawh buailo uh a, hih min tawh a kilo, a kiciamteh mite’ zingvai nitak vai a kipan khangsawnte’ ading dong buaipih zaw uh hi.

Min buai a buai leltakna in ong khenkham in, ong thanemsak, i ma ong khak i lam bingsak leltak hi.

Mipi pilvang in khuadak ni. Mitnuai maiphiat in hak kilkel ni. Pau Khat Suan