Africa ah papikhat Humpi in apehlaitak Video ki khahkhia

Africa ah papikhat Humpi in apehlaitak Video ki khahkhia

Humpi (Lion) khatin papikhat apeh, ataalkaih laitak Video ki khahkhia hi. Tua Video Clip pen South Africa, Limpopo Province sung aom Marakele Predator Park ganhing khawina “Animal Sanctuary” ah akizaih kici hi.

Video sungah papikhat humpi khatin petin ataalkaih laitak kimuthei a, cikziat huai mahmah hi. Tua papipa pen British gammikhat kici hi.

Tua humpi pen sikdai sungah akikoih hi a, nasem khatin alanglam ah azolkhiat laitak in papi kumtamsimsim khinkhat humpi kikhawina daisung ah lutsuk hi.

Tua papipa in zonpheikhat neihileh kilawm a, leilak ah ninthemkhat asuihphei ciangin tua Lion zong hong lehngatvat hi.

Tua papipa zong manlangtak in sikkongkhak omna lamah ataiphei ciangin humpi inzong delhpheipah hi. Tua papipa sikkongkhak panin ataikhiat madeuhin humpi in bawhphei in, petkhalian hi. Tuaciangin apamlam ah taalkaihphei vingveng hi.

Tua papipa zong humpi in petkawm in ataiphei pihciangin cimawh in huhna ngenin awngvangvang hi. Adang ageinai aom pasal khatzong a otgawp kiza a, khatpeuh in Rifle thau vala un ci’n a ot kiza hi.

Ageinai ahzong numeikhat kapgawp in a otlala kiza a, tua numeinu pen papipa ii atanu hihtuak hi. Kapa honkhia un, mikhatpeuh in kapa hong hotkhiat sak un ci’n kapkawm in akuvava kiza hi.

Tuazawh ciangin thautawh akikap, thauging kiza a, tua humpi pen taikhia kici hi.

Video: Shocking footage has emerged of a lion mauling an elderly man after he entered its enclosure in an animal sanctuary in Limpopo, South Africa.

Police spokesman Motlafela Mojapelo in agenkhiatna ah tua papipa pen silo cibilbel a, ahi zongin agawl leh akhaguh liamgawp ahih manin, zato ah ICU (Intensive Care Unit) ah kikem hi ci’n genkhia hi.

Tua papipa pen amin Mike Hodge kici a, kum 67 aphakhin British Expat khat ahihi. Amahpen tua ganhing khawina aneipa kici hi.

Tua humpi akikhawina sikdai sungah agim anamsia khat kiza ahih manin humpi pawlkhat inzong tua agim namsia hangin nopmawhsa uh cihi. Tua agim namsia bang hidinghiam ci’n Mike Hodge in sikdaisung ah lutphei in, akhe tawh sulphei in tuaciangin humpi in abawhphei ahihi.

Mike Hodge pen ganhing kepsiam, humpi te bangci kepding cih athei mahmahkhat hi a, ahi zongin tuahsiatding ciangin kipelhthei tuanlo hi.

More: Kawlgam sum tungah General Aung San lim tuansak kikding ki lunggulh

South Africa, Limpopo Province sung aom Thabazimbi Area pen ganhing khawina “Marakele Animal Sanctuary” minthangkhat ahihi. Tua ganhing khawina sungah khualzin a ennuam te aki umcip mawtaw tawh paikawikawi in, ganhang te omzia, khuasakzia ki etpihthei hi. Sawltak #zomidaily