Human Rights i cihcih (UDHR of the UNO) bang hangin thupi hiam?

Human Rights i cihcih (UDHR of the UNO) bang hangin thupi hiam?

Human Rights i cih pen nidang in kiza ngeilo banah national government i cih gam-uk kumpite in saang theilo pongmawk hi. Tuhun ciangin, i utloh pipi ong semsak, suahtakna ong pia nuamlo le zawhthawhthu a zangh gam-uk kumpite hangin Universal Declaration of Human Rights (UDHR) sung a kigelh article 30 te kithupi sak mahmah ta a, democracy gam khempeuh in constitution a gelh uh ciangin a deih uh article 4 le 5 a tawmpen laden uh hi.

Human Rights a deihlo le a omlo na gam ah, thumaanlo a kimat kihenna, zawhthawh thu tawh thong khiatna, thumaanlo pi maan hi ci a thukimna, mipawlkhat pen a mawhna lianlualo napi in khantawn thong khumna thuak sak ahih kei leh khailupna thuaksak cih te tam mahmah thei hi. Hibang zia tawh ki-ukna ki deihlo ahih manin, UNO i makaihna tawh UDHR ki thupi sak mahmah hi. Tua tawh kizui-in UNHCR in national government hoihlote i, gammite a bawlzia uh le a haksatna uh ong theihpih ahih manin, asylum seeker le refugee a siaute ong huh in gamthumna pai theih nading(resettlement) zong ong gelsak pah uh hi.

UNHCR registration i ngah a, nambat i ngah lian ciangin hih Malaysia hiam Thailand ah hiam ei pen asylum seeker cihna status ki ngah a, protection laidal khat ong pia in, tua khit ciang, ong interview toto in, gamthumna i paitheih nading dong ong tuttoh tak ciang, resettlement program ah ong hel in, UNHCR card tawh ciaptehna ong nei uh hi. Hih te pen Human Rights i cihcih UDHR of the UNO sunga i muh article 30 te hang ahih lam thei in Human Rights tawh kisai zong ei le ei sintoto leng pilna khanna a hih lamtak kong theisak hi. Mihing pen a ki nungta nuam tek ahih manin Human Rights i cih mihing nuntakna thupit sakna le mihing khat le khat i kibawlsiat lohna ding theihna le pilna sungah i khantoh ding thupi hi.

Tua ahih manin, khantawn thong le sihdan, i pilna tawh kituak nasep ong kipiaklohna le ki muanmawhna(suspect) mikhat mat mawkmawkin thongah khum cihte le huh ding a kilawm mahmah refugee le asylum seeker hinapi-in huhteng cihthadah kolbulh in thongsungah khum in, UNHCR i status a piaksa te zahtak bawllo in suksiatsak zaw cih te pan i kipelh theih nadingin, Human Rights thupi sakin, hih tawh kisai study zong bawl in sinna neih ciat ding leh ei le ei pilna i kipiak ding kong hanthawn hi. I veng i paam a om mite zong i gensawm ding hoih ka sa hi. Palikte bang tua bang a tello tam mahmah lai uh ahih manun, deihtak in gentheih kisam mahmah hi.

Mr. David Ngin Sian Pau
UNHCR Asylum Seeker and Refugee
Kuala Lumpur, Malaysia
2011-03-14