Htin Lin Oo (ထင္လင္းဦး – Wisdom Villa)

Laisim mimal khempeuh tungah Merry Christmas!!! Lungdambawl bawl hun sungah Thupha namkim sang dingin kong deih sak mahmah hi.

Tusung Kawlgam sung thupiang tampi sung panin NLD te’ thusungpi (ျပန္ၾကားေရး တာ၀န္ခံ) a hi Htin Lin Oo(ထင္လင္းဦး – Wisdom Villa) tawh kisai thu in Kawlgam mailam a dingin thuman thutak hong lak khia ding thu hi ci-in ka lawp mahmah hi.

U HLO in October 23 ni-in Sagaing gamhuam, Chaung Oo khua ah lailam tawh kisai thugenna a neihna mipi tungah, “Gawtamah Buddha in Kawlmi/Burma mi hilo hi. Gam leh minam vai ah Gawtamah thu thu tawh ki sawhpawi theilo ding hi. Minam it taktak te-in zong tua India minam Gawtamah biak huai lo hi. Buddha tangthubu ah Satdan Sai kumpipa zong mi gina lo sabeng pa in a kap nop ciangin Phung-gyi puan sanpi silh in na kaplum hi. Tua hih manin Kawlmi leh Kawlgam pen Phung-gyi puansilh mi pawlkhat in hong susia uh hi” ci-in thuman thutak hong pho laak khia a, Zanggam kawlmi te’ lakah ki lungluut mahmah hi.

Hih kammal te-in Kawlgam ki-ukna ah Buddhist Phung-gyi te hong thuuk lut semsem in Minam kembit Upadi cih khawng leh Biakna kepbit nading Upadi te a langdo nuam hi-in ka um hi. Democracy diktak tawh akikal suan theihlohna bulpi in Kawl biakna kepbit ding hanciamna hang zong ahihi. Tui leh saithau a kigawm theihloh mah bangin zuau leh thuman ki gawm theilo ahih manin, “Buddha biakna Burma minam ၊ ဗုဒဘာသာ ဗမာလူမ်ိဴး” a cih denkei uh pen zuaupi a hih lam thumong hong kipan ta hi ci-in ka deihkaih hi.

Tapidaw te’n pulpit tungah i gen zel hangin biakna dang te-in hong zaakpih loh uh a, za phial leh zong tui lakah a pau bangin hong thupi simlo uh hi. Tu hun ciangin lamlah, niangtui sai nangawn ah kikup theih dingin thu mong hong ki pan a hihi.

Vantung vangliatna nusia in mawhnei mite gumkhia ding leh honkhia dingin hong pai Topa Zeisu in a nungta tawntung Pasian Tapa a hihlam tukum Christmas pan kipan in Kawlgam mite in thei ta ding uh hi.

Isaiah 9:6-7
“Banghang hiam cih leh, eite a dingin naungeek khat hong suak a, eite’ tungah Tapa khat hong kipia hi. A mah pen eite a hong ukpa hi ding a, ama min pen, “Lamdang Thulakpa, Vanglian Pasian, Tawntung pa, Nopsakna Kumpi” kici ding hi. Tuhun a kipanin a tawntung in David kumpi tokhom tung leh ama gam sungah thutang leh thuman phut in, a lian semsem a ma ukna leh nopsakna in mong neilo ding hi. Vanglian Topa deihluatna in hih thu hong tungsak ding hi.

John 3:16
“Pasian in leitung mite hong it mahmah a hih manin a ma Tapa a um mikhempeuh si nawnlo in a hin tawntung na dingun a Tapa neihsun a hong piak dongin a hong itna, a hong lak hi.”

Tapa a Um mi kempeuh ci ahih manin lungkaak nawnlo in na sansa thu lenkip inla, Lungdambawl hun sungah lim pahtak ki puah ki-ap in. Topa in Kawlgam sungah a buhlom te kaikhawm dingin nang teekteek hong zang nuam hi.

Laisim kempeuh tungah Lungdambawl leh Kumthak Thupha!!!!

Suumpi