Pasal khat Hotel saap piaksawmlo in, Telephone khau tungah luaiphei in cimawh

Pasal khat Hotel saap piaksawmlo in, Telephone khau tungah luaiphei in cimawh

Pasal khat Hotel ah zingtung hi a, ahi zongin Hotel saapding sum piaksawmlo in, Telephone Cable khau tungah luaiphei in ataisimsawm leh vandawn ah awkcip cih China Daily pan kiza hi. China, Guizhou Province sung aom Panzhou Hotel ah abeisa Friday ni in thupiang kici hi.

Panzhou Hotel ii tawlet “Windows” panin Telephone Cable tungah luaiphei in, agalkhat aom innsang mahmah Building khatdong ah atundong aluaipheisawm ahihi.

Ahi zongin asawmdan in tua alanglam aom Building dongah luaiphei zolo in, alaizang ah awkcip hi. Tualaitak khuasung mipi te’nzong agamtatna galmuh in, Video leh Photo zong kizaihpah ngeingai hi.

Hih Telephone Cable khautawh aluaina pen sangmahmah a, leilak panin vandawn ah 60 metres (Pi 196) bang sang cimawk hi. Media pawlkhat te’n Hotel inndawl 19 na aom Window panin aluaiphei ci uh a, 19 Floor pen sangmahmah khading hi. Ama luaipheina pen Telephone Cable hi in, meitha in ahuptheihloh hangin, atunglian ah Electric Cable zong akikhung hi a, tuate tawh aki sukkhakding lauhuai mahmah cihi.

A ngaihsut bangin alanglam aom Building dong aluaiphei zawhloh ciangin vandawn ah khawlcip in, aki hotkhiatding ngakin omcip tamawk hi. Tuaciang in Panzhou Firefighers te kizasak in, tua Firefighters te’n honkhiat uhhi.

Video: Man stuck mid-air after trying to skip hotel bill using telecom wires between two buildings

Hotel lamsang ah ki kaipheikik in, ki honkhiathei a, ahi zongin thunei te’n mansuakpah uh cihi. Tua vandawn ah acihmawh laitak Video kizaih in Chinese Social Media minthangkhat ahi Weibo tungah ki khahkhia hi. Tua Video pen ki limet mahmah a, a enbekbek 7,350,000 views bang phakhin hi.

Related: Malaysia Genting Highland paina Cable Car kialo hi

People’s Daily te’nzong YouTube ah tua Video Clip pen khahkhia uh a, tuciangciang a enpen 904,119 views bang phakhinta hi. Hihpa gamtatna Video panin amukhapeuh in haigamtat mahmah hi ci’n gentek uhhi. Sengam sungah Penglam galkap honkhat omleh kilawm hi 🙂 Sawltak #zomidaily