Hosanna! … That un! :: Rev. Dr. Thang Cin Lian

Hosanna! … That un! :: Rev. Dr. Thang Cin Lian

Rev. Dr. Thang Cin Lian MBC GS ding a telcing in ong ngah ciang lungdampihna, Angtanna, Phatna, Pahtawina … etc..namkim i pholhkhia ziahziah a, lam-etna tampi kihel thusuahte ban ah Siapa’ brief biography dong in i suahkhia ziahziah hi.

Lungdam takpi hihang. Angtang takpi hihang. I lam-etna zong lian takpi hi. Siapa i muanna lian ahihman zong hiding in ka um hi.

Ahi zong in Minam khat sung a makai hilo a, minam tampi kigawmna gam lianpi khat sung a makai ahih lam i mangngilh khak ding lunghihmawh huai kasa hi. Makai picing khat in a makaihna ah guptuam paihtuam, deidan leh angvan deuh a neihkhak loh ding thupi mahmah ahihman in, zaipi huam nasepna pen kong kawcik neukhat bek pan i etluat khak ding patauh huai kasa hi.

Siik li a nei inn lianpi khat a nawl a tawhletno khat bek pan i etleh mukim lo, mukhial baih ding hihang.

Siapa’ thu i gen kawm in tulaitak a Topa’ ong lapsang sak Zomi ulian mahmah pawlkhatte zong ka phawk hi. Rev Khoi Lam Thang ( Kawlgam Bible Society ), HE Pu Hau Do Suan ( Kawlgam tangmi, UNO New York ), HE Pu Hau Khan Sum ( Kawlgam tangmi, UNO Geneva ) amaute, mi tampi lak a khat hilo in, Kawlgambup in khatta bek a neih mun a panmun ah a tute ahi uh hi.

Topa i Pasian in Zomite ong lamsanglo i cithei diam? Lungdam loh theihloh, angtan’loh theihloh, kipahloh theihloh ahi hi.

Lungdam siam ni. Kapah siam ni. Angtan’ siam ni. Pahtawi siam ni. Hamphatna leh minphatna laksiam ni. Apil asiamna uh, a liat a thuneihna uh pilvang tak a zatpih dan siam ni.

Tuni a “Hosanna! Hosanna!..” aci Zomite, zing ciang “that-un, that-un…” acite i hihkhak ding kidawm ni.

Topa i Pasian mah in ama’ min thupi kipahtawina ahi ding in Zomi Khangthak tampi ong lamsang semsem tahen! … Amen.