Hong tawsawn bang-hiam? ~ Pu Zokhai

Hong tawsawn bang-hiam? ~ Pu Zokhai

Zomi laaizom Zolai simthei khempeuh, Nisim ngaihsutna, nuntaakna, kalsuanna bangkim-ah bang-in hong tawsawn ahihiam? (what motivates you?). Hih dotna-pen mimal kimciat-in ama’ lungsim tawngnung pan-a dawnding hi-a, nangmah-in nang hong tawsawn banghiam cih na-tel penpen dinghi, banghanghiam cihleh thulehla khatpeuh geelding, gending, sepsuahding ahongsawl-pen mi hilo-in thulehla nangma’ muhna, saanna leh lametna tungtawn-a na’ khentatna ahihi (your decision in accord with your own opinion, acceptance, and hope). Hihpen ngeinabang mihing (normal or common human being) cihna ahihi.

Gaalkaapte-in Burma Socialist Programme Party (BSPP)-mintawh 1962 kum pan-in Kawlgam hong ukcip-in tuni ciangdong “Khuaknimna (Brainwashing)” kizom to-hi. Hih khuaknimna masuan-ah bangteng hong kithun khinzo-hiam cihleh:

Tungsiah thuthu mangding :hih thu-in Zomi biakna kalsuanna, tualsung kipawlna kalsuanna leh minam kipawlna kalsuanna naakpi-in hong sukha-a, tungsiahte’ khialhna leh thaneemna apulaak omleh “mibanglo, mi-tangpeek, thuduh, thusia-pawi..” ci-in mipi ataangpi-in aseh theih nading-in kipantah uhhi. Hih-pen kipattahna hoih-hiam sia-hiam cih enpak lehang: makaaite’ thuthu mangding cih hinapi makaaite leh makaaite-mah makaai hong kituh uh-a, pawl hong kitam-in pawl nih/thum hongpha-a, tua mun-ahzong “makaaite’ thuthu mangding”-mah kici laailaai-hi. Makaaite’ thu manglo-a pawltuam aphut hikhin napi-in makaaite’ thu mangding akicih teeiteei-pen thumaan thukhial akhentatding nangmah bek ahihi).

Nuaisiah simmawhding :hih thu-pen akammal-tawh “nuaisiah simmawhding” cih kipulaak lo-in nisim gamtat kampau sung-ah kizangh ciatciat cih kei mimal-in ka-telmuh thu ahihi. Nautaang-a akiseh mipi ataangpi-in makaaite akhuplet zawh lohding atelna-uh tungtawn-in akhutlet ngaaplote-in makaaite’ cihcih akawi amaan-a mangding cih kithuzawh ngiat mai uh-a, tua-tawh kizuui-in makaaite’ maaipha muhding haanciam-in kidembawl uhhi.

Tuabang-a kituhtehna tungtawn-in tungsiah ahihkeileh makaai-a akiseh zawdeuhte-in amau amaaivil zo zawdeuhte-mah maaipha piazaw, amaaivil zolo zawdeuhte tuambawl, hihteng-tawh makaai zawdeuhte-pen taanglaai sila kikhawi hunlaai-a silate-in atote laángluun (buukno khat sung-ah tutna nuam mahmah koih-in tua buukno kizawng liatliat)-tawh zawng, apai nading lampi-ah puanza phah cihliang dinmun-tawh mitmuh gamtat-in atunloh hang-in ngaihsutna (ideology) lamsang-ah hong kibang-hi.

Tua ahihman-in nuaisiahte’ tung pan-a tungsiahte’ lamet (the superiors’ expectation from the inferiors)-pen tote leh silate zah-in honglian-a, tungsiahte’ khialhna (fault), thutanlohna (injustice), namdeina (racism), golhguukna (bribery), kihhuaicipna (corruption)-a kipat thusia khatpeuh apulaak omleh makaai upate nangawn-in za naailo liang-in amau’ khawisa silate-in tua thu-pulaak mi-pen langpan sukpah, kosukgawp, ui-ko ak-ko-a kosuk cihte tu-mahmah ciangdong I-muh, I-tuak, I-thuak honghi ta-hi. Hihbang ahi ding-a nuaisiah simmawhna lungpuak hong kiguan ahihi.

Mimal meet nading-bek seemding :hih thu-zong makaai upate’ muuk pan-in gingkhia saamlo-a akilehbulh-in pawlpi’ ading, minam’ ading -mah ci tangtang bilbel-in sepsuahna-ah ahihleh mimal meet nading-bek muiituum-in kinei-hi. Kam-tawhbel ahoih theithei, azai theithei kigen tawntung-a, sepsuahna leh kalsuanna-ah ahihleh angsung min leh hauhna bekbek ki mitsuan-hi. Masuan khat kipatding-pen tua masuan azanghmi (consumer or customer) te itna leh deihsakna-mah pauhlap-in kinei saam napi-in tua azanghmite summeetbawlna-in ataangpi-in zangh-hi.

Mimal meet nading omlo ahihnaakleh kitheihmawhbawl lel-in, mimal meet nading mu akisak naakleh zumna-meel theilo liang-in kitah, kituulmawh-in mi phatnuam-bang kituh liang zahdong lungpuak (mindset) kinei ta-hi. [hih thu-ah, angsung zong lo-a minam or pawlpi it-a thumaanthutak leh itna-tawh akalsuan khat leh nih a-omte ataangpi-in ‘tangpeek’ bang-in mipi-in sehzaw tawntung-hi].

Sila lungpuak : Sila lungpuak-pen atung-a thu 3-te’ gah ahihi. Kawlgam leh Zogam bih-a lai kahong gelh hang-in India seem-ahzong tuabangmah ahihlam ngilh tuankei-ni. Sila lungsim-in sila hong suaksak-a, to kinei diimdiam-hi. Tuabang kalsuanna hong khanglian lua ahihman-in Zomi ataangpi-in amau’ nunna neilo (they don’t own their lives) dinmun tung-hi. Tua ahihman-in mihing khat ahihkeileh kipawlna khat’ kaihlim (puppet – ရုပ်သေး – khau-tawh aki gamtaang sak lim) suak-hi.

Tua sungpan-in khenkhat-in amau’ tote’ omzia hongtheih pianpian ciang-in amau’ tote’ tungtawn-a amau min leh hamphat nading angsung zon theihna hong kisin uhhi. Atote aphatphat bang-in thugen lasak hongnei-a, ama’ tuplehngiim ahihleh tua tungtawn-a amah minthang khading, mi-in thupisim khading cih ataangpi honghi leuleu-hi. Atote-inzong amau aphatphatte mi’ lak-ah pahtawi sukpak lel-a, tua takteh silapa/nu-in atote sihpih ngam zahdong-in beel thei-hi. Tua ahihman-in taangpi kalsuanna-ah ama’ hihnatak khahsuah (gives up his identity)-in atote’ sila hihna-tawh thugen-in lasa uhhi.

Min leh Zaá cih bekbek kipaksak-a, tungsiahte’ maaipha bekbek kizong-hi. Kiukna genloh, minam, tualsung, biakna avekpi-in lawh ahihman-in biakna ngialbang-ah Pasian’ Min phatding sang-in siate’ pahtaakding, upate’ pahtawiding, pawlpi mite’ phatding lunggulhna-tawh pulpit kituhtehna hongkhang-hi. Makaai upate amaaivil zolote-in kiukna/minam/tualsung/biakna cihte-ah Stage or Pulpit tuh zolo-mawk ahihman-in makaai upa maaivilna/maai-etna NGEINA (culture) bang-in kiseh ta-hi.

Khuaknimna thuzing neuno 4 bekbek et-in tuhun khang tuihual paizia kimu thei ahihman-in hihzah I-suutpak dinghi; aneng-atawng-a asimnuam I-omleh (T. Zokhai, 2015: Khuaknimna leh Zomi: Yangon) hong vaaikha le-uhcin hongkhaak theiding hi’ng.

Hihte theihding akisam ahihi. “Ka’ kalsuanna, ka’ pau kaankaanna, ka’ laigelh, ka’ thugen lasak, ka’ sep tantan….. khempeuh keimah mimal’ khentatna takpi-tawh akalsuan ka-hihiam? ahihkeileh ka’ tungsiah, ka’ makaai upa khatpeuh’ maaipha lunggulhna-in hong khentat sak hizaw-hiam? Hoih ka’ sakte aseem-mah ka-hihiam? ahihkeileh ka’ to, ka’ pu-in hongsawl bangbang aseem hizaw ka-hiam?” cihthu naakpi-in hih tuhun Zomite’ lungngaih ding-a athupipen khat ahihi. Mi’ phatna azong, tungsiah maaipha azong, makaai upate’ maaipha azong Zomi taangpite-in amau’ nunna neilo uhhi. Hihthu ziak-in Lai Siangtho sung-ah “Topa khatbek, Hilhsiampu khatbek nei uhteh (you have only one Master, only one Teacher), nole-no ‘Topa, Sia’ kici kei un,” hongci ahihi.

Tua Topa leh Hilhsiampu/Sia khatbek I-neihpa bekbek thudong lehang “Sia” hong kicih ding ki-lunggulh hetlo ding-a, mite-zong “sia” cihding kilawp pampam khollo dinghi. Tua Topa leh Hilhsiampu/ Sia bekmah “To”-in nei lehang I’ thugen lasak, seplehbawl khempeuh hong tawsawn-pen mi/ tungsiah/ sumlehpaai-a kipan leitung nate hilo-in, Thumaanthutak-in hong tawsawn hiding-hi. Tuabang kalsuanna I-neih ciang-in mipi’ pahtawi nading sang-in thumaanthutak-tawh mipi akhanlawh nading, aphattuam nading kilunggulh theipan dinghi.

Tua Hilhsiampu khatbek I-neihpa’ hong thuhilhna khial ngeilo ding-a, mite-in hong gensiat hang-in ki-puuk ngeilo dinghi, banghanghiam cihleh tua Hilhsiampu/Sia leh To-pen Lampi, Thumaanthutak leh Nuntaakna ahi ZEISU ahihi. Thugen lasak, seplehbawl nakhempeuh hong tawsawnpi-pen tua takciang-in ZEISU hita ahihman-in mite-in bangbang-a hong langpan zong-in kipangpaa ngeilo-hi, banghanghiam cihleh Amah-pen, “Lau kei un, note leitung beidong Kahong ompih dinghi” hongci Pasian ahihi. Zomi Pasian’ Thupha! Zokhai (60 Narr-Maen Drive, Croydon Hills VIC 3136, Melbourne, AU)