Hluttaw Meeting ah Pu Cin Khan Pau thusun

Hluttaw Meeting ah Pu Cin Khan Pau thusun

Pu Cin Khan Pau (USDP Teelcin MP, Tedim) in tuni Hluttaw Meeting 16 veina ah Covid-19 dona leh dalna adingin World Bank Sumleitawi $ 50.00 million zatna ding tawh kisai-in thusunna khat limtakin nei thei hi, cih kiza hi. Pu Pau in a thusunna ah:

“Covid-19 Case 1 pen keima constituency huam sung pan hi a, a kikepna Tedim zatopi pen lupna 100 bek ahih manin inn leh lo vanzat kicing het lo hi. Zato gol zaw anai pen District zato Falam leh Kawlpi ah puak ding hi leh zong MP te ngiat in deih lo mawk uh ahih manin haksatna lianpi tuak hi ung.

Tedim khuapi mahah a lem bangbangin Siavuan Siamahte leh volunteer te hanciamna tawh kikem a, Case 1 pen tu-in cidamin zato tuak khin hi. Tu-in mipi lam pan ICU kisap luatna mu uh ahih manin mipi aituam hanciamna tawh ICU nasep kipanpan ta hi. World Bank sum leitawi sung panin Tedim khuapi adingin ICU Project hong kihel ahih manin zong lungdam mahmah ing.”

Pu Pau in a genbehna ah:

“Tua banah Covid-19 hang a haksatna a tuakkha township huam sung nektawm haksate kiangah khua khat ciangin 11,500,000.00 ta hawm dingin geelna om, cih thu hangin zong lungdam huai sa ing. Tedim khuapi huam sungah khua 130 om a, tua sung pan khua 65 in huhna MMK. 11500000 ngah ding uh hi. A dang teng in ngah lo ding uh ahih manin ngaihsut kong piak nopna ah hi bangin ciangtan loin inn tamna zui-in hawm diamdiam thei leng hoih ding hi, cih hong gen nuam ing,” ci hi. Tedim Post