Hausa pan tawp ~ Pau Khat Suan

Hausa pan tawp ~ Pau Khat Suan

Tedim, Myoma hausa Pu Peter Thawng in damloh leh zato kah ding paulap tawh hausa sepna pan tawpna lai a beisa May 31ni in puak a, zato hoih zuan in zinkhia khin hi cih thu kiza hi.

Pu Peter Thawng leh innkuanpihte Topa’n damna lungnopna leh bitna ong piaksak henla, mipi tawh dingkhawm a mapanna lawhcing ding in ong mapisak tahen!

NB: : Pu Peter Thawng pen a thudik, a nunnem, mi khempeuh tawh kiho thei mi khat hi a, a tate a vek in kumpi nasem hi in, CDM ah hahpan mahmah bilbel uh hi.

Amah pen Misokte’ koihtawm hausa hilo hi. A lamdang phial, a om ngeilo zah a Myoma mipi in meetang khat zong pelem lo a hausa a ateel uh ahi hi.

Hausa nasep mipi in i theihpih ding a ahoih pawlkhat om hi. Gtn. Thunei khatpeuh mi’ inn ah lut ding ahih leh a khua, a veng hausa upa lo tawh lut theilo hi. Tua ahih man in, hihbang hunsia laitak hausa upate ut takei leh misokte in thaumuk ngat a a tonpih loh a phatmawh hun om thei hi.

Mipi in telkhial thei hi. Tuabang hileh mipi in telkhial thei a, paikei leh lah a dek ah thaumuk kiphut hizel thei hi. Tua dinmun utlo ahihman a hausa upa sepna pan a tawp tam simsim hi.

Pu Peter Thawng in hausa pan tawp a, damloh tawh zato hoih zuan ding, hun sau sim paikhiat a kul pen ama’ ading ahi zong in, mipi’ ading ahi zong in ahoih ahi hi. Om in bingtawp hileh misokte’n telkhial ding a, tawplo hileh mipi thutheilo hon mangpi khat in mukhial ding (khin … zong hithei) hi.

Hausa dangte zong tuabang dinmun ah om a, alang alang ah telkhialhna bek thalawh a a om tampi om kha ding in ka um hi. Mipi in thu i theih ding, thu i kan ding kisam kasa hi. Upmawh thu tawh thulian ah mawktat khak loh ding thupi ding hi.

Hih thu ka at pen, hausa dangdangte’n zong etteh thei leh ka deihna kawm leh, mipi in zong i khua hausa upate’ dinmun i theihpih ding, thu limtak kan masa lo a ei’ upmawh deihkaih khuaigip meek khawng tawh i tatkhialh khakloh ding ka deihna ahi hi.

Kua ki-gensia

Hopih theih a omlote, amau’ thu bek thu a sate leh phakban lohte awi leh deih abat loh ciang ki-gensia thei hi. Hopih theih in om in, thu kuppih theih hi leteh ong gensia tawm mahmah ding hi.

More: Politics laibu sim in! ~ Pau Khat Suan

Ahih hang, i omna pen Leitung ahihman in, bangzahtak na dik zong in, na dinmun ong haza, ong bawlsia nuam tantan pawlkhat om veve ding a, tua ban ah molhtum a ong zangnuam mi gina lo pawlkhat na nawkkha veve ding hi. Tuate’n amau’ deihbang a ong zattheih loh ciang ong gensia veve ding uh hi. Awlmawh kei in! Upmawh leh mumang pau hilo a, phutkhat tuahkhak thu tampi siksan a ka gen ahi hi. Pau Khat Suan