Happy Valentine’s Day ~ Pau Tun Thang

Happy Valentine’s Day ~ Pau Tun Thang

Misiangtho Valentine ni pen Valentine’s Day kici-in,kumsim in February 14 ni sialin leitung gam tuam tuam ah kizang hi. Kum thak khitcianga ni thupi masa pen ci leeng kikhial lo phial ding hi. A tom in ki it ki ngai te’ ni cihna hi pen ahih manin, adiakdiak in lawm kingai Khangno nungak, tangvalte in ngaklah in, nopci theithei in zang uh hi. Hih Valentines Day a piankhiat zia a tomin ensuk ding hi hang.

Misiangtho Valentine pen kumpi Claudius II hun laiin Rome ah siampi khat ahi hi. Tua hunlai in kumpi Claudius II in a kumpi gam ahih theih zah in kemcing hi.Melma ten do zel ahihmanin Claudius II ading galkap hong tawm sem sem hi. Zi nei khinsa ten a zi leh tate uh nusia nuam lo uh hi.Lawmngaih nei tangval ten lah a lawmngaihte uh paisan ding haksa uh hi.

Tua ahihmanin galkap a lut nuam mi tawm hi. Galdo ding galkap hong tawm tak ciangin kumpi Claudius in Dan thak khat bawl hi.Tua Dan in nupa nungak leh tangval kiteen ding phallo hi. Valentine in tua dan hoihsa lo ahihmanin a sim tham in zi nei veve hi.

Valentine in kiteenna kitangsam sa hi. Nupa suahna om kei leh kiteenglo a nupa banga omkhawmna(Living together) mawhna khang zaw ding ci hi. Zan khat kiman in Suangkulh sungah kikhum hi.Thusitna banah vuak leh sat thuak in February 14, in si hi. A sih khit AD 496 ciangin Pope Gelasius in February 14 ni pen misiangtho Valentine zahtakna ni a zat dingin ciamteh hi.

Valentine in amah a leh hek Asterious ii’ tanu Julia tangthu, tuatdan(arithmetic) leh Pasian’ thuhilh zel hihtuak.Valentine in Julia thunget sak zel hi. A sihkuan ciangin Lai khat gelh in tua ah Julia tawh a kilawmtakna hangin lungdam thu gen hi.Tua banah Pasian tawh kinai den dingin hanthawn hi. A tawpna ah “Na Valentine kiang pan” (From Your Valentine) cih gelh hi.

Ki it-kingaite adingin ni thupi khat ahi hi.Ki itna kilawmtakna ki latsakni ahi hi.Thu kigelh Card leh present tuam tuam piakna tawh hun kizang zel hi.Valentine’s Day symbol a tuam tuam om in lungtang lim, Vakhu lim etc. khawng kilimzat peuh mah hi. N. Pau Tun Thang