Hankhuk sungpan ka lunggulh

Hankhuk sungpan ka lunggulh

Kawlte’ paunak ah, “Pasal te in hankhuk a tun dongin zi deih, numei te in hankhuk sung dongah niik deih” ci, hi phial mawk leh kilawm. Papi pawlkhat in, “Ka sih teh na nu tawh hankuang khat ah hong vuikhawm un!” cih kam vaikhak a neih mah bangin nupi pawlkhat in ka sih teh ka niik, …tua hong piak pen, nute ni-a ka ngah pen hong keng sak vo!” ci-in sih kam vaikhak thei hi.

A si ding dinmun ih tun taktak ciangin silh leh ten neklehdawn tawh ka buainawn kei hi. Ka dam lai-in ka neih sunsun tawh check-up na kibawl zel leng hici lo ding cih ka kisiikna lian mahmah hi.

Tu-in lupna tungah sih ding bek ka ngak ta hi. Hun khat lai-in akipilsak, kihatsak, akineisakpa, aki siangtho sak leh biakna mi kisa pa, zun leh ek a nam thitthit lupna tungah bangmah neilo in thanem, lung-am takin ka haina teng ka ngaihsun kik hi.

Solomon in, “A mawknapi, a mawknapi, na khempeuh a mawknapi” a cih pen ka tel sinsen thei ta hi. Buangnai khedap bulh te leh taih khedap bulhte in a siangtho’na mun a pai uh teh kheguak mah ahih bangin Topa’ kiang kheguak, tangguak in ka zuan ta ding hi.

Hunkhat lai-in ka sum, ka mawtaw te tawh tungto leng ka ut mahmah hi. Mailam ngaihsutna tawh haksa takin ka khol sumte zato leh zatui lei nading ahih lam ka thei ta hi. Ka tanu te’n hong bawlsak hankuang sungah ka neih ka lam teng a ta phial zongin bangmah ka keng thei kei ding hi.

A kineihkhem mi pawlkhat te’ leh ka zi, ka tate’ mai-ah zawngkhal in asi ding ka hi ta hi. Nong sagawhthukna te uh leh lengla nong dosaknate hangin ka nuam mahmah hi. Ka damloh lai-in kibawl nading hong leitawi le cin ka nuam zaw lai ding hi.

More: Christian Hymn te’ tangthu: Si-a Khut Guak Masuan Ding Maw?

Kah nading tha neilo zahdong in lam-et bei kisa ka sanggamte na khetui nulding tamveipi ka kithawi hangin ka tangzo mahmah kei hi. Samsiatna leitung nusia in a tawntung Pasian kiang zuan ka hih lam tello na hih manun na hamsia mahmah uh hi. Tu-in tel taktak ta ing, “Nuntakna cih pen samsiatna leitung tawh kipana sihna tawh bei hi. Ahi zongin sihna pen beina hilo zaw-a tawntung nuntakna kipatna hi.” Xa Xang