Hanciamna i neihding mah thupi ~ Tg. Samuel Nas

Hanciamna i neihding mah thupi ~ Tg. Samuel Nas

Scientist minthang, Michael Faraday pen a neulai in zawng mahmah uh hi. London ah khanglian ahih hangin anu leh pate in pilna deih bangin sinsak zolo uh hi. Lai sim thei mialmial, lai gelh thei mialmial cih ciang bek mah hi. Hong khanglian in amah leh amah kivak ding hong kipan nuam a, nasep hong zong hi. Laibu bawlna (publishing company) ah laibu kawm belh nasep khat hong ngah hi. Aman pen pilna deih ahihmanin tua a laibu bawlte lunglut takin na sim zel hi. Physics lamah lunglut diak hi.

Hua hun lai in Humphrey Davey a kici mi khat om a, amah pen physics lamah research scientist minthang khat hi. A Royal Research Organisation ah naseppih ding a zon laitak hi. Tua thu Faraday in a zak ciangin lawp mahmah a, nasep va siau pah hi.

A pilna in cinlo ahihmanin lab sung hahsiang ciang bek mah nasep ngah hi. Ahizongin lungkia tuanlo a, a tavuan pen bel takin sem hi. A siapa research bawl vai ah lunglut mahmah ahihmanin dotna tuamtuam dong thei zel hi. A siapa in zong hoih takin na don in a laigelhte zong simsak zel a, tua panin pilna tampi la hi.

A sawtlo in Faraday zong ama aituam research bawl thei ding dinmun ah hong ding ta hi. Community Council ah member ahi dingin kipia a, tua council sungah scientist leh research bawl mi minthang tampi om uh hi. Hih pen aman hun lemtang ah la in kisinna in nei hi. A laigelhte leh a lawmte laigelh khawng etkak in, tua panin kisin toto a, mainawt semsem hi. Tua leh, Humphrey Davey pen Europe lamah research bawla a zin hong kul vat hi. Faraday in zong zui hi.

Hih a zinna un Faraday adingin a mai hong kihonna khat suak leuleu hi. Thuthak tampi va sin thei a, inn hong tunkik ciangin electric motor leh transformer (mei setpi) hong bawlkhia hi. Tua panin amah zong mi lawhcing khat ong suak hi. Hih a lawhcinna pen ka pu Davey in hong deihsakna hang hi ci-in zahtakna pia den hi. Faraday pen tu-in scientist thupi mahmah khatin kiciamteh den ta hi.

Na khat peuhpeuh ah, deihna taktak i neih a hanciam nopna lungsim i neih nakleh i mai hong khak nuam a tam hang, kilawhcing thei veve hi. Hanciamna i neih ding mah thupi. (Ref. A Treasure Trove Of Lasting Values – Jose Dominic) – Tg. Samuel Nas