GZA, Zomi Maikai le Kipumkhatna ~ Zam Thuam
Global Zomi Alliance hong piang lian ciang a kinial masa pen in Zomi bup a huam takpi hiam cih hipah zen hi. A kibuaipih khat in a min mahmah hi pah hi. Min pen i nu i pate in hong phuak lian pen i min taktak hi in, ahih hang min dang tampi kinei thei hi. Nang le nang na kipiak tawm, na lawmte in hong itna tawh hong sapna, cih pan kipan tampi hong om ding hi.
Zomi mipi te ahih leh abuai pih taktak un, innkuan sung nuntak nop ding bek hi a, minam min cih le minamvai cihpen kam-uih nulna sangin a tamzaw lo kinial mawkmawkna ciang a a nei za ah sawm sagih kim hilel hi. Tua mite pen minam cihsangin a biakna uh tawh a kisai pawlpi tawh a limbuai zaw vive hi lel hi. Annekna hi kei ci in a buailo vive hi mawk uh hi.
Tua in bang tawh hong nungzuih hiam cihleh na makai cihuh Biakna makai vive hilo maw hong ci uh hi. A kikhopna pawlpi sung le a biakinn sung pan a pualam a kantan zolo a lungsim hi cih ding hi pah hi. Kipawlna in bang ciang huamhiam cih pen a khiatna na khiat zahzah nang ading a huam hi a, na khiatkhialh leh hong kihilhhilh man nawnlo in hong kipaisan phot zaw kha ding hi.
Zomi Makai
Nasem dingin kalsuan hong kipat peuh ciang Zomite kinialthu in makaite in ama ading palai aih kei leh tangmi ahih le ahih loh hong hipah takpi hi. Zomi te pen i buai masakna in makaipa, founder pa cih hi ci in mitampi in gen khin hi. Tua buaina le kinialna mah kiza masa hi. Makai cih in bang hiam cih a khiatna khiatdan kibanglohna pan a kipan hi ding hi.
Mawsi pen makai ahi hi. Aungsan zong makai ahi hi. Barack Obama pen makai hilo hi. Gam lutang ahi hi. Makai cih pen kitello a, mipite in hih pen i makai hi ei ci in a lungsim tawngpan a sanuh mite ahi hi. Gandhi pen India suahtakna makaipipa kici napi ama khut sungah bang panmun mahmah a om kei hi. Panmun gol penpen letna in makai hong pia hi tuanlo hi.
Kammal zatzia khel ding kisam ding hi. Miman makaipi cih sangin minam lutangpi cih huaizaw hi. Kipawlna cihpen kikaihkhop tawmna hilo in a kikaikhawmte kigawmtuahna hita hi. Makaih ding zong kuamah na utlo kha thei ding hi. Simbeng zong kimcitciat tangzang kiguan cih pen tulaitak kitelkhial hi. Atangzang kiguan hi bek in makai kiguanlo hi.
GZA panmunlente tawh theihna kibang siamna kibang zong om lai ding a tuate ading buaihuai thu hilo hi. Amaute siamna a va gal-et thei ciang mipi pawlkhatte in hih thute telhuai ka sa hi. Hih nih khitciang a cianlai mipite ahih leh kamtamlo ding uh a, bang kinialbualbual na hi uh hiam ci in lungneu mahmah ding hi.
Kipumkhatna
Lunggulhna kibangtak in mailam kum bangzah ah hi ci ni cih lametna lian ( Vision) neihzawhlohna in a tunga kinialnate hong piangsak hi. 2008 kum in Post Eden Drive kici kum 100 project a kibawl laitak in Chin State bup lungdam in kinialna omlo hi. Dr Do Sian Thang makaihna hilo hi kici peuhmah lo hi. Grand Strategy a cih pen hileh kilawm kasa hi. Tua khat nei in mipite tung lakkhia thei leng tua in kithutuakna hong pia thei ding hi.
Kipumkhatna cih in kithukhatna hilo a, thu kituaklo tampite’ nasepkhop theihna hizaw hi. Kinialna pen kitotna hilo a, kilemlotna zong hipah lo hi. Kipumkhatna i cih in kinialna tampi tawh a hoih pen ding nasep khop theihna kici thei ding hi.
Mipi hizahta thukimna le muakna tawh a kipan khia GZA in kipumkhat zawhlohna cih thulu pen nusiat huai ding hi. A kipumkhat thei, nasem khawmthei teng kalsuan kholhkholh ding hi zaw hi. A phawk masa sa in hong nungdelh ding ahi hi. Zing tho zolo khat ngak in vai tampi kipelhsak hun hi nawnlo hi. A tangpek teiteite zong tangpek sak ding hi lel hi. Mipi panpihna omlo in Minam ding zolo hi. Mipi in koi pen a man le a muanhuai hiam cih a khentel theihna ding hun piak ding bek kisam hi. Aman kei leh damdam in hong mial ding a hong bei lel ding hi. Phukpai sese kullo hi.
(Kumpi te nasep nagawn mipi sungpan journalist ten a muh bangin a gelh mang bangmah in ka theihna kicinglo pi tawh ka muh bang in kong gelh mang hi.) Zam Thuam
Comment piaknop aomleh...