GZA leh Indian Ambassador Kimu

GZA leh Indian Ambassador Kimu

GZA leh Indian Ambassador to Myanmar H.E Mr. Gautam Mukhopadhya te’n kimuh
khopna tuni (Sep 17) ni nitak lam nai 4:00 pan in nai 4:35 kikal sung
Indian Embassy, Yangon ah nuamtak in neithei uh hi.

Embassador in lengla muakna in “Hun la in omkhawm hithiat leng ka ut luat
himah hiven pelh theih loh thu khat om mawk in nai 4:40 ciang bek hun nei
ka hih man in kisuang mahmah ing” ci hi. Kihonate atom in:

GZA: Ko Global Zomi Alliance pan hi ung. Hun nong piak lungdam mahmah ung.
Tuni kong paina uh pen Manipur buaina tawh kisai in ka lung himawhna uh
hong gen nuam aa hong pai hi ung. Ka deihnate uh zong lai tawh hong
gelh ung in hehpihna tawh nong piaksak ding in hong thuum ung.

Ambassador: Kuki, Mizo leh Zomi bang kilamdanna om ahia ?

GZA: Ko zong Kuki hi veve ung.

Amb.: Ka zi Kuki hi

GZA: Tua ahih leh ka sanggamnu uh aipah ve

Amb.: Ka tapa zong amin Zam Mang hi

GZA: Manipur assembly in a pass bill 3 te pen India gam thukhun
(constitution) tawh kitukalh in mu ung

Amb.: Bangci bang aa ki tukalh ahia ?

GZA: Article 371 C ah singtang mite tawh kisai thu khat peuhpeuh ahih
nak leh, money bill losiah, Hill Areas Committee (HAC) ii thukimna
kisam masa hi. Tutung bill te a pass ma un HAC tungah bang mah dotna
leh theihsakna om vetlo hi. (Money bill tawh kisai pen article 110 ah
siangtak kigencian aa tutung aa bill te pen money bill hi hetlo hi –
behlap)

Amb. Tutung aa aki pass bill te pen ataktak in singtang mite gawtnopna
hilo zaw aa meitei te zong singtang mite mahbang in anuntak theihna
ding uh deihna hizaw ding hi.

GZA: Gammi hihna 1951 kum pan ciangtan hi. Tua hunlai in tulai
singtang gam aa mite gen loh khuaminte na ngawn ki ciamteh khalo hi.
(Hih zong article 5 tawh ki tukalh mahmah hi. Article 5 ih et ciang in
singtang mite India gammi/citizen of India hilua mahmah hi – behlap)

Amb.: Tua thu bel akician in thei keng.

GZA: Hih bill te kikipsak leh singtang mite atamzaw gamdangmi/
foreigner suak loding ahiam ?

Amb. Ken bel tuaci muh keng. Aizong na laite uh na piaksak peelmawh
ding hi’ng.

Atom in tuateng hi.

GZA in India kumpipa alaikhak pen makaite’ phalna a om leh zing leh
thai ah mipi’ muh ding in kong suaksak ding hi.

Lungdam

Mung Lan Thang/ Thangboi
Zangkong