I theihsa tek mah bangin khentuam neilo Zomibup tawh kisai kipawlna lian penpen i neih GZA khawmpi a thum veina pen Yangon khuapi ah November 24-27, 2016 hunsung kibawl ding hi.
Tua mah bangin Leitungbup Zogam gamthak khat ahi USA gambup kumpi kiteelna zong November 8, 2016 sung mahin om ding a, tukha sungin vai lianpi nih kigel cih ngaihsun pha kik ni.
USA gam pen a lamdang phadeuh gam thupi khat ahi hi. Banghang hiam cih leh minam khempeuh teengkhawm in innteek khawm lingling uh hi. Zomi tampitak innteekna gam zong ahi hi.
GZA kipawlna tha pialo mimal i om kei ding hi. Thapiak zawh dan dinmun bel mikim kibang kei mah inteh. Ahi zongin GZA langpang keeibel tuciang ciang kuamah omlo hi. Minam it tek cihna kilang hi.
USA Election:
Leitungbup a huzapzo pen USA gam kumpi ding pen Pasian a zahtak kumpi a hih ding thupi hi. England le USA gam hizah a leitung maitang aluah zawhna pen Pasian na masak uh hiphot hi.
Ahi zongin USA gamah tu lamlam ciangin Pasian awlmawh nawnlo in Pasian deihna tawh kituak hetlo thukhun tampi hong zat uh teh a vang neih zah dinguh nei nawnlo in kiamlam manawh suksuk ta hi.
Sodom le Gommorah bangin gimna lianpi a thuak dinguh lauhuai mahmah a, Pasian zahtak kumpi khat hongkah hileh tua gimna lianpi pan kipelh thei lai ding hi. Thungetna tawh phawk ciat ni.
Donald J Trump & USA Election 2016
Donald J Trump pen Company lianpi khat anei Owner/Managing Director hi a, sum lametna hileh ama sumlut tawh nuamsa mahmah khin bek thamloh Election a lutna hangin sum tampi beilawh khin hi.
A beisa USA dinmun pen gamkhat buaina om leh sum tampi bei in va buaipih luailuai den a, a kisam lualo mun tampi ah $ Billion tampi bei lawh in avui atang tawh va khut ngangngang thapai uh hi.
Obama in vote a ngah theih nadingin Pasian thu tawh kituak hetlo nu-le-nu, pa-le-pa kiteen theihna tawh vote zongin gammi tampite Sodom le Gommorah bangin Obama mitsuan in vote pia uh hi.
Hillary Clinton peuhmah hongkah leh Obama maban zomin mihingte deihna bulphuh Pasian thu tawh kituaklo nu-le-nu, pa-le-pa suakta taka kiteen khuan piak zihziah dingin vote zong lai hi.
Pasian thu tawh a kituak zaw in i etkak ciangin Donald J Trump pen a lamet huai zaw Christian gam makai ding hong suak mawk hi. Bangbang ahi zongin Pasian in Zomite hong taisan ngeilo ding hi.
Minam sungah,
Dal Sian Hung
Kuala Lumpur, Malaysia.
Saturday, 5 November 2016
Comment piaknop aomleh...