GZA: Kawlgambup kiteelpina tawh kisai tangkona – 2

GZA: Kawlgambup kiteelpina tawh kisai tangkona – 2

Kongit uh ka Zomi pihte khempeuh aw, Itna takpi tawh nakhut uh honglen in GZA pan in kong hopih uh hi. Pasian thupha leh adaihna leitungbup a om Zomi khempeuh tungah athak in hong tung kim ciat tahen! Kum 2020 November 8 ni a hongtung ding a term thumna Gambup Kiteelna vaitawh kisai in anuai a thu THUM i telkim ding in kong phawk sak nuam uh hi.

A masa pen in hih Kiteelna ah Mee (ballot) apia thei ding khempeuh in mee piak kim dingin kong hanthawn nuam uh hi. Banghanghiam cihleh

a) Pasian in Ama’lim Ama’ meel (image) sun in mihing hongbawl a, sia leh pha teel theihna ding suahtakna (freedom of choice) hong pia hi. (Piancil 1: 26-28) Tua hi a, hong uk ding makai leh kumpi ding teel theihna, mee piak theihna in mihing na hihna mantak leh suakta tak a, a: zangkhia na hihi. Mi hing khat in Mee tang khat tek bek i nei a, tua zong Pasian hongpiak mi khempeuh suahken kikimna (equality) a hihi.

Mee kiteelna ah suakta tak in na deih penpen mee na piakna in Pasian hong piak suahtakna mantak a, azang khia na hi hi. Mee khia kei lecin Pasian hongpiak suahtakna zang lo in na mihing hihna zong a sum a zaang na hi hi. Na mee tang khat in mihing na hihna hong taangko hi.

b) Pasian in nang Kawlgam mi a hongbawl na hi-a, Gambup kiteelna ah mee na piakloh ciangin Kawlgambup tungah a cingtaak zo lo na hihi.

c) Pasian in nang Zomi a zong a hongbawl a hong piansak na hi-a, Zogam makai kitelna ah suakta tak in nadeih penpen teel in mee napiak kei leh na Zomi nam tung ah a cingtaak zo lo na hi ding hi.

Thu nih na pan in Party te leh meekuang lui dingte tung ah thu kong vaikhak nuam uh hi. Ih minam leh i khua i tui, igam ilei puahnuam zuunnuam tek na hihmanun meekuang lui dingin kithawi na hi uh a; hong paakta in kong zahtaak uh hi. Na painopdan uh na policy uh kibang lo in kilam dang ding hi. Na kiseel,

na kinial ding uh hi. Tuapen Democracy pan a, i ngah suahtakna hi a, kinial, kiseel (debate) dingmah mah a hihi. Ahitazong in mi khatpeuh in khankhom a, amangngilh mawh ding in, mimal vaai, innkuan vaai, behlehphung vaai, biakna vaai peuhmah tawh nong kiko, nong kitot khak hetloh ding uh kongphawk sak phapha nuam uh hi.

Tuabanga mite khankhom leh ngilh mawh ding a miko mitotna pen mi cingtaak lo tualniam mite (uncivilized) zat bek ahihi. Citawm mahmah i hihman in i minam sung ah kimuhdah na khaici hoihlo hong vawh kha het kei ta un.

Athu thumna pan in kiteelna pen mipite teel hiphot phot a hihman in, teelcing leh teelcing deuh lo, nong om teekteek ding uh hi. Tuahun ciang in teelcing te zong lungsim hongpicing unla, teelcing deuh nailo te zong lungsim hong taangzai sak ta un. Kiteelna a mankhit ciangin i vekpi in khut kilen kawm in igam ilei, ikhua itui leh i Zomi nam puah khawm zuun khawm thei dingin pil leh ciim hongtuh ciat ta un.Ko thu kongnget sak tangtang uh a, kong nget saksak lai ding uh hi.

Akhak bel in 1960 kum November kha sungin US America gam kiteelna ah Democratic party ten zo a, teelcing John Fitzerald Kennedy pen USAmerica te 35 na President hong suak hi. Kum 1961 January kha 20 ni vuuksan vuukngo thuak a hong kikhawm ami zatamte mai ah ama’ nasep kipat thugena (inaugural speech) a, a thupatna laigual masa tawh kathu uh ka khum nuam uh hi.

Tua pen, “Tuni in eite- in party khatpeuh tung ah gualzawhna pawi a khaam hi lo- in, aluui hoihlo khempeuh khel in athak i pat theihna ding a i ngahsuahtak na a aai i hi hi” amah’n ci hi.

(We observe today not a victory of party but a celebration of freedom, symbolizing an end as well as a begining, signifying renewal as well as change …) Party khempeuh, Meekuang luui (candidate) khempeuh leh Zomibup tung ah Pasian thupha athak in hongtung kim ciat tahen! Itna tawh, GZA Makaipi teng October 5, 2020