Gul it mahmahkhat agulkhawisa in viallum
Britain gamsungah gul a it mahmahkhat, akhawisa gul in kawilum, viallum cih SCMP pan kiza hi. Tua gulpen African Rock Python akici tham namte hi a, asauna 2.4 Meter bang asaukhat ahihi. Tua gulpen aminzong phuahsak in “Tiny” cih min avawhsak ahihi.
Gulkhawipa pen amin Dan Brandon kici a, England, Hampshire sungah ateeng ahihi. Dan Brandon in gulpen itbawl mahmah in, innsung ganhing “pet” bangdan in innsung ah akhawi ahihi.
Agul tawh lumkhawm in, agul in akawi in akinei hidinghiam, Dan Brandon ii pumpi tungah kivialvial in, aviallum hiding hi ci’n sihnathu akankhia Coroner khatin genkhia hi.
Dan Brandon ii anu in agenna ah atapa pen alupna Bedroom sungah asisa in kamu a, agei ahzong agulkhawi kamu hi ci’n genkhia hi.
Coroner Andrew Bradley inzong Dan Brandon ii sihna pen hih Python gul hangmah in asi hiding cihi.
Python gulpi in aheh in aviallumbel hiloding a, ahi zongin angailua, a it lua in Dan Brandon ii pumpi tungah kivialvial in, asawt ciangin naklahsak in, aviallum hiding cihi.
Dan Brandon pen gul a it mahmahkhat ahih mahbangin alutpna Bedroom sungah gul akigawm in 9 bang khawi ciliang hi. Hih aviallum “Tiny” acih Python pen adang gulte sangin hatzaw, khauhzaw in limtak a etcik phadiakkhat ahihi.
More: China ah numeikhat in sumbawlna in Cobra Sokval gul tampikhawi
Adangdang gulte sangin thahat, thakhauhzaw ahih manin, Dan Brandon in tua Tiny gulpen agawl ahzong kivialsak ngamlo cihi. Dan Brandon in kum 15 aphak akipan innsung ah gulkhawi akipan hi a, asih in kum 32 phakhinta hi.
Bangbang ahi zongin ganhingbel ganhing himawk hiven maw….. Sawltak #zomidaily
Comment piaknop aomleh...