Guh pawm natna (Osteoporosis) ~ Hau Lun

Guh pawm natna (Osteoporosis) ~ Hau Lun

Guh a to dingzah to zo nawnlo-in tawmcik sukkhak bek tawh guh a ki tan zawh leh guh pawm natna nei ki ci thei hi.

Singkung sang tung pan kia cih bang, mawtaw in hong nawk kha cih bang nakpi takin guh sukkhak na a om ciang a cidam guh khat zong ki tan zo hi. Ki mawlna pan, lampai laitak ki tuukna pan in a cidam guh pen ki tan zolo hi.

Naupang te pen kahlei nih na, thumna pan, phung sang lualo pan a kiat hang guh ki tan zolo hi. Ahih hang kum 50 cingkhit hun guh hong pawm ciang kisil buuk ah ki taal na pan, lampai kawm lam sikkhial in tuuk zong hilo tuuk dektak ahih manin a ki nanna bek pan zong guh ki tan thei hi.

Guh cih pen annek tuidawn, gamtat daan leh hormone te hangin hong khauh tektek a, kum 30 ih phak ciangin a khauh pen, a sah pen hun ahi hi. Tua hun pen guh cidam pen hun ki ci thei hi. Kum tam semsem, gamtatna zong tawm semsem leh hormone zong hg kiam semsem a, kum 50 dong damtak in guh khauhna hong kiam ta hi. Kum 50 val khit ciang guh khauhna hong nawh kiam mahmah ahih manin tawmcik sukkhak na pan guh ki tan zo mawk hi.

Kum tam hang bek hilo guh pawm in guh ki tan baih sak a hang tampi om hi.

1. Kum 45 cin ma niin kang baih numeite

Numei hormone in guh ki lamna hatsak hi. Kum tawm lai-in niin kang baih leh guh zong pawm baih pah hi. Niin kangbaih numeite in hormone zatui ne le guh pawm natna pan dal hi.

2. Khanggui ki zom in guh pawm natna a neite

Guh pawm natna in khanggui ki zom in piangthei ahih man in khanggui ah tua bang natna a nei aom te-in guh khauhna teh in guh Siavuan tetawh ki lakpah ding, guh pawm dalna zatui nek pah ding ki sam hi.

3. A gawng lua te leh meh ngolh a hau te

Gawngin tha neilo te in guh ki lamna ding aki sam dat tuamtuam ki cinglo pah ahih manin guh pawm natna ngah thei hi.

Kel nawi, bawng nawi aki pan guh a pa ngasa, Calcium dat tam ki hel nek theih tuamtuam nekna in guhpawm natna pan hong dal thei hi.

• 4. Steroid zatui sawtpi a ne te
• 5. Zatep, zu dawn te
• 6. Sawt a tu lua te (Tut kawm a nasem te)
• 7. Nisa tawh ki mukhalo te (Zan lam nasemte, inn sung bek ah a ki bu te)

Ni awi ciang a ki ngah Vitamin D in Gilpi pan Calcium daat huup zawhna tha hat sak hi. Vitamin D ki cing kei leh guh ki lam na ah a ki sam Calcium tawm ahih manin guh pawm natna ngah thei hi.

8. Thyroid Hormone tam te, gilpi damlo-te in zong guh pawm natna ngah thei hi.

Guhpawm natna pen pumpi tungah ki hilna, noplohna cih bang omse lo ahih manin ki thei hak thei hi. Nakpi in ki tuuk lo napi guh ki tan ziau cih khawng pan guh pawm natna neih lam ki thei pan thei hi.

Tua bangin guh ki tan khit ciang theih pan loh nadingin kawngna, khukna, gawl guhna cih bang natna na thuak phet, guh Siavuan te tawh ki lak pah ding thupi hi.

A thupi penpen ah kum 50 ciang guh a pawm loh nadingin kum 30 in guh a khauh mahmah ding ki sam hi. Kum 30 in guh a khauh pen hun a hih nadingin neu tuung pek pan Calcium, Vitamin D a cing tak aa ngah nading nawi tuamtuam, aktui te ne-in, nisim a tawmpen ni vang nuai ah min 20 sung om ding thupi hi. Ni khat in min 30 sung exercise bawl den ding zong thupi hi. Deihsakna tawh, Hau Lun Lam-etna (Ref: Ziwaka Magazine)