Gualzawhna pen Matutna tawh kiteh

Gualzawhna pen Matutna tawh kiteh

Belgiumte’ gualzawhna tactics 3 te..

• 1) a sang lam zangsiam uh
• 2) amau’ kunglam humbit zo uh
• 3) thakhat a nawkvat

1) A gamla, a nawl, upmawh huailo pan a sangpi ah bawlung ki galpiak in, tua bawlung pen alu tawh a phu ziauziau thei ding mi, a tunsang amai ah omsak uh hi.

Asang a thagol, mi sang a a sangzaw maigual ah a om kul hi.

2) A langte in amau kunglam ah a phutsuak zawhlohna ding in a kung uh nakpitak hum bit uh hi. A tha neih uh a tamzaw kung humbitna in zang uh hi. A siamna khempeuh uh tawh dal uh hi. Amau’ kung ah bawlung khauhtak a pai kha hetlo ding in daltheih zia khempeuh tawh dal uh hi.

3) A tawpna ah bawlung lop siam, hawlsiam, khemsiam, etlawm tak a kimawl thei, kilek zialzial, mi tampi khemzo, bawlung ama’ khe ah kemcip zo… etc etc cihte in muhnopsak mahmah napi tuate tawh azo alel thu kikhen lo a, goal bangzah khumzo cih in thukhen ahi hi.

Tua ahihman in, goal a khuptheihna ding in thakhatthu a nawk, alangte tangsak manlo, dal manlo a phusuak ziau cihdan zatsiam uh hi. Tuabang a ahihtheihna ding in manlang mahmah kul ahihman in, khatguak in bawlung hawl a taipih kaihkaih cihbang omlo, maikahte thakhat a a mailam ah thaneihzah a tai in bawlung kipia mengmeng uh a, nawksuak ziau uh hi.

Manlangtak a taikawm a bawlung kipiak siam mahmah uh hi.

Minam nasepna, kipawlna nasepna ah khatguak hilo, milom ma pankhopna ah etteh theih ding lesson hoih mahmah kimu thei hi.

Milom tha tawh sep a kisam maban peuhmah ah amah guak in bawlung a ukcip, a kemcip nuamte leh mailam nawt ding sang, a etlawm tak a tualpi laizang a kilek zualzual ding utna lel tawh kigualzo ngeilo hi.

Gualzawhna pen a etlawm tawh kiteh lo a, matutna tawh kiteh hi.
Tua ding in…

• 1) asang lam zatsiam ding hanciam ni.
• 2) ei’ kung, ei’ hihna, ei’ neihsa, i minam, i kipawlna humbit siam ni.
• 3) Tangtat lo in, kipawlkhawm, pangkhawm, kipia diamdiam a nawkkhop dan thupi ngaihsut ni. Pau Khat Suan