Grab Company te Kawlgam ahzong kipanta

Grab Company te Kawlgam ahzong kipanta

GrabCar ahih keileh GrabTaxi ci’n akithei phadeuh Grab Company te tuni Tuesday (Mar 21) akipan Kawlgam ahzong Service kipanta uhhi. Grab Company tepen South-East Asia gamsung ah kilimzat mahmah in, Kawlgam nangawn ah Service akipan hita uhhi.

Abeisa in South-East Asia gamsung aom gam 6 ah aki limzat mahmahkhin hi a, tua gamte pen Singapore, Indonesia, Philippines, Malaysia, Thailand, Vietnam cihteng ahihi. Tuni akipan in Kawlgam ahzong Service kipanthak uh ahih manin, Myanmar pen Grab Company te ii gam 7 na hita hi.

Kawlgam sungah Grab Company tepen Yangon khuapi sung aom Taxi Drivers honkhat tawh kipan masading uh a, aki taangsapna dungzui in damdam in khuadangte ahzong Service behlap totoding uhhi.

Myanmar kumpi inzong gamsung ah Public Transport System pen akhan tohsaknop mahmah laitaktawh kituak in Grab Company te lutkha citciat uh ahih manin, ki lungluttuam mahmah hi.

Grab Company pen Singapore gampan in 2012 kumin hongki pankhia hi a, Headquarters pen Singapore mah hipah hi.

Grab Company tepen Uber tetawh akidem mahmah uh ahihi.

Nidang in UberCab zong akici “Uber Technologies Inc” pen 2009 kumpek panin hongki pankhia hi a, Headquarters pen US, California State sung aom San Francisco khuapi ahihi.

Grab tepen South-East Asia sungbek ah hipan mahleh Uber tepen leitung gam tampitak ah kizangkhin hi.

Grab pen South-East Asia gamsung aom khuapi 30 val bekah kizangtheipan himahleh, Uber pen leitung gamtuamtuam aom khuapi 528 te ah ki zangthei khinhi.

More: GrabCar nazat veve, GrabShare tawh Booking lecin sumbei 30% phatuamding

Grab Company te tuni Yangon ah kipanding cih azak ciangin Uber te’nzong Statement khat khahkhia uh a, Yangon Government tawh Partnership bawlding kikupna omkhinzo a, asawtlo in Uber Company zong Kawlgam ah luttading hi ci’n tangkona neikhia uhhi. ZD Sawltak #zomidaily