Gensia hawmthawh leh

Hih kammal pen eimite sungah I lungkim lohna khatpeuh aom ciangin aki limzat phadiak kammal khat ahi hi. Kei mahmah in zong nong hawmthawh leh nang’ hih pah in. Nong hawmthawh leh nang bawlpha, genpah, sempah in, cih bang dan a tuamtuam in kazangh khathei zel hi. Ka ngaihsut kikikteh tua bang dan a kazat pen dik kasak lohna pawlkhat ka mukhia hi. A masa in hawmthawh thu gen masadih ni.

Hawmthawh: Bawlung(foot ball) I ki mawltak ciangin I goal khumdingpa in Kungpangpa omlo in sui-in hong khum kei leh ki hawmthawh mahmah hi. I ki thuahpihpa in eima deih bangin hong piakei leh ki hawmthawh mahmah hi. I goal ngakpa in bawlung olno tak in a leitai a kisui pen na mankha kei leh ki nak hawmthawh mahmah hi. Hici bang ki mawlna ah eilam pawl a tuaci pawl ah ki helkha hile hang, ki hanghang, ki awngawng nuam maikhading hi. Tua pen I muhdah man hipeuhmah loin I hawmthawh luatman gualzoding a, I utluatman ahi hi. Pawlkhat in na leh lak-in a kitai, a kicih khaktak ciangin hehin nuak a, ki mawlkimlai khawlhiau, paikhiahiau thei uh hi.

Lamka lam-a, ciamnuihsiam a, aminthang Pa. Sumpi in Ciamnuih a, a genna khat a takpi zong hihtuak khatvei Bawlung ki mawlna khat ah a Kungpan(goal keeper) pa bawlgam(singgam) piakhalo uh ahih manin Bawlung a paiteh manlo in a khutzepsa in naom phiuphiau hi. A lawmte khat in bang hanga na manlo lawmlawm na hia? acih leh Bawlgam(singgam) nete in manve ua, cih tawh dawng geih kici hi. A lawmte’n vuagawp, satgawp, cilphihgawpnuam khading uh hi. Tua pen a muhdah man uh hilo in a hawmthawhluat man uh na hizaw hi. Naupang khat kapkap in a nu/pa te’n a khemkhem hangin tawpnuamlo a tawpna ah bengek uh hi. Khat leuleu a nu/pa te’n thu hilhhilh mangnuamlo a tawpna ah tuaci ken cita le-uh mang tuanlo ahih manin sat uh hi. Tua pen a muhdah man uh, a it leh man uh hilo in a hawmthawh luat man uh ahi hi.

Khatvei hunkhatlai Kawlgam ah Sangsia khat in sang naupang khat lai hilhhilh gualkhat pen sawmvei bang hilhta leh theizo mahmahlo a tawpna ah sat hi. Tua pen a muhdah man a asat hilo in a deihsak man, a hawmthawhluat man a, asat ahi hi. Khatvei mi honkhat Pawibawlna dingin sabeng, mikhat in a kinai mahmah a, sakhat nakap in khalo mawk, a lawmte hehlua, kogawp uh tua pen amuhdah manuh hilo, a simmawh man uh zong hilo in a hawmthawh luatman uh nahi zaw. Hih thute I ngaihsut I et takciangin hawmthawh cih pen muhdahna neumuhna lamsangin ki deihsakluatna lam a kizang kammal hi leh kilawm kasa hi. Tua ahih manin mikhat in hong hawmthawh leh hehpah loin kipuahna in neithei lehang I khangtozaw ding in ka lamen hi.

Gensia: Gensia cihtak ciangin mi hih loh napi, Eg: guta lopi khat guta ci-a, midangte kiangah ki dawmun ci-a, I gen leh a gensia I hi hi. A hi zongin Guta khat hih pa/nu guta hi ki dawmun I cih leh a gensia hilo in I midangte’n a van uh a mansak loh nading a khual a agen, thumaan a hilh I hizaw hi. Tuni in na hih loh napi hong kigenkha hiam? Na hih na hong kigenkha hiam? Na hih loh napi hong kigen khak phial leh zong khasiapah tuankei in, nikhat niteh amaan hong kitel veve ding hi. Na hina hong kigen khak leh zong nasapah, mi mudahpah kei in bang hanga hong kigen hiam, cih kantel masa inla tua panin kipuahpha lecin na lawmcing zawding hi.

Khatveilai in kuamah uk nailoh na gamkhat omin tua gam pen lamet loh pi-in amau sanga hatzaw gamin hongla in hong uk uh hi. Mi pawlkhat in hanciam in thu ngenthei te’n thu ngenin, tha le ngal tawh ana nak hanciam mahmahpawl zong na om hi. Hun hong paipai in Pasian in nikhat niteh a hanciamna uh dawngin agam uh a ngahkik theih nading uh lampi honsak, hun honsak in amau minaam sunga ulian khat khutsung hong tung kik hi. Ahi zongin tuapa in tualam tawh kisai bangmah sem nuamlo in, a gambup uh khantoh naiding, pilna siamna zonna ding College leh University te, matawlampi, vanlenglampi paina ding a kipan a tuamtuam hih theinapi in hihlo hi. A minambup uh ki pumkhat nading ki thuhual nading hihthei napi in zongh hih tuanlo hi. Ahi zongin hun hong paipai in tuaci bang, avei leh asem mi hong kipat ciangin tua pa in neumuh in tua dan a na hih uh bangmah khuasuak kenteh cihsan in a ut bangin gengawp mang hi. A mipihte pawkhat in bang hangin tuaci bang’ nangmah’n hih theinapi ci’n hihlo in a hihte gensia zawsawp nahiam acih takciangin pawlkhat in na gensiat sangin nang’ hih pahve, nang bangciang semta na hi hiam, cih san uh hi. Kua pen mi hawmtawh, kua pen mi gensia, agam uading semlo, deihsaklo ahi zaw diam?

Gensiatna I cihte zong aman nahi thei a, ki hawmthawhna khempeuh zong a sia leh ki muhdah man hikhinlo thei hi.

Khaibawi