Genloh a phamawh ta thu ~ Cing Van Kim

Genloh a phamawh ta thu ~ Cing Van Kim

Leitung khantohna tawh kizui-in i zak mengmeng het loh naupang kumcing nailote kibuan, kisimmawh bawl nate kimu a, kiza kiaukiau ta hi. Ta numei neite ading bek hilo, ta pasal nei te in zong a phawkhuai le kidophuai thukin khat ahi hi. Tua ahih manin zahmawh thu tawh kisai nulepa, ulian picing sate in a pelh huai pawlkhat a om mah bangin i tate zong i theihsak ding pawlkhat a om hi.

NULEPA / PICINGSA ULIAN TE’ THEIH DING

1. Naupangte it cih paulap in (sil sak, siangtho sak cih bang danin a kisap hun longal) a zahmawh uh ut bangin sawk sak, lawng sak lo ding hi. A suahpih zahmawh tawh kisai in zong ciamnuihna in neihsak loh ding ahi hi.

2. Naupang te’ muhna ah puansuah sa, guaktang in omlo ding hi.

3. Naupangte’ muhna ah kum tawh kituaklo zahmawh video, movie le kampau te musak, zasak lo ding hi.

4. Phone a zang naupangte nulepa te in encik gige ding hi. A hih theih leh phone tawh internet zat sangin innkuan pihte’ muh kim theih ding TV tawh zat ding thapiak huai zaw hi.

5. Meltheih / zahtak mi khat ahi phial zongin a picing sa khat tawh naupang te nih guakin paisak loding, nusiat loh ding ahi hi.

NAUPANGTE I HILH DING THUTE

1. A kum tawh kituak pianpih vante’ thu hilh ding ahi hi.

2. Naupangte’ kepcing le seel sim nading mun (a diak in a kalkawm, a awm le a taw) te kuamah lawngsak, sawk sak le limlak sak loh dingin hilhcian ding ahi hi. Tua munte a sawk a lawng sak a om leh nulepa te kiangah gen pah dingin vaikhak ding ahi hi.

3. Nulepa longal theih ngei / theih ngeiloh khatpeuh in ong sap leh zuih loh ding, bangzah in ong lausak hang up loh ding, tua bang a tuakleh a ngaih pen in awng in huhna nget nading vaikhak ding ahi hi.

4. Nulepa le tate kikal ah kamseel khatpeuh zangin tua a gen theilo te’ nung zuih loh dingin naupangte vaikhak ding ahi hi.

5. Ta numei / ta pasal ahi zongin mikhat peuh i kepcing nading mun le pumtung nate sawk sak, lawngsak, zahpih sak loh nadingin hoihtak hilh ding ahi hi.

6. Naupangte kimawl kawm sa-in niik le puan leem sakna, zahmawh thu tawh kisai kammalte tawh kiphinna zat het loh dingin hilh ding ahi hi.

7. A kisil uh ciangin kisil buuk a sung lam pan a kalh nading a lian zaw deuh naupangte tungah hilh ding ahi hi.

8. Naupangte a liat khit ciangin zuntha, awnghawh khit sim amau le amau a sil, a kisiansuah theih nading uh hilh ding ahi hi. Phawk khak pak teng gelhna ahi hi. Cing Van Kim