Gamhaute lakah thunget a hatpen USA te (May 2 – National Day of Prayer)

Gamhaute lakah thunget a hatpen USA te (May 2 – National Day of Prayer)

Leitung gamhau mahmah leh gam nuamsa mahmahte lakah USA pen thunget a hat pen gam khat in kumsimin na kiciamteh hi. Picing sa za ah 55% in nisimin thungen uh, ci hi. Kumpite makaihna tawh Gambup Thunget Ni cih khat President Harry Truman in 1952 kumin na tangko khia a, kumpi thukhun sungah kihel pah hi. 1988 ciangin President Reagan in May kha nipi zawh ni 4 ni (First Thursday of May) pen gambup thunget ni dingin na kipsak beh hi. 1972 kumin gambup huam thungen komiti khat phuan khia uh a, tuate in kum simin thubulphuh ding leh zat zia ding geel uh hi.

Gamhaute lakah kuate thunget hat pen hiam, cih a kikan khiat ciangin nisim a thu a ngen mi phazah za ciangin anuai abangin Pew Research Center te in mu khia hi: 1) USA – 55% (GDP $56,000); 2. Japan – 33% (GDP $38,000); 3. Norway – 18% (GDP $ 68,000). Gamzawngte lak pan thunget hat pen gamte in: Egypt 72% (GDP $11,000); Afghanistan 96% (GDP 2,000); Nigeria 95% (GDP 1,972). Thunget hat lo penpen gam in China hi a, za ah 1% bekbek in nisimin thungen uh, ci hi. A lamdang mahmah khat ah Isreal mite 27% bek in nisimin thungen uh hi. Hi munah thungen cih ciangin biakna nei khempeuh’ Thungetna genna ahi hi.

Bang hangin pawlkhat thunget hat a, bang hangin pawlkhat thungen loin om lel uh hiam, cih thu tawh kisai-in mipilte genna ah: USA bang pen gam suakta mahmah khat ahih manin biakna vai kihat banah mizawng leh mihau kikal kuam thuk lua ahih manin thunget kihat hi, ci uh hi. Gamzawngte pen gamhaute sangin thunget hat zaw hamtang, ci uh hi.

Ahi zongin a zawngte bek in thungen ding hi leh Khristian mihau tam penna gam hau mahmah USA bangah thunget kihat het lo ding, kumpite nangawn in makaih in thukhun bu sungah na gelh lo zel ding uh ahi hi. “Topa pen Pasian a nei minam in thupha ngah ahi hi…” (Late 33:12) cih thu mah kikhel lo a dik Pasian kammal ahi hi. Zomite sungah a zawng zawdeuh teng bek in thungen maw, ahih kei leh a zawng teng thungen lo hi zaw ding?

More: America Khang kikhelzia khendan ~ Thang Van Lian

Zawn man leh hauh man, pil man leh hai man tawh kisai loin eite hong bawlpa leh a Tapa Jesuh Khris zang a hong Honpa ahih manin i hi bangbang hong it i Pasian naih in thu a ngen Zomite hi dingin Topan thupha hong pia kim ciat ta hen. Topa tawh kizopna limci a nei den Zomite hong suaksak ta hen. Thang Van Lian