Galphual ~ Bob Tuangpi

Galphual ~ Bob Tuangpi

Leitung gam liante kidemna kikal ah pilvangtak a om siamlo gamte galphual suak-in agam suahtakna uh tanlawh uh a gamdangte’khutnuai atun mah bangun tutung gambup buaina veve ah mun pawlkhatte galphual suakin naakthuak phadeuh vut leh vai suahlawh uhhi.

Kawl makai leh biakna makai honkhat in alunghimawh gen zel na vuah leitung gamlian penpen gamnih kikal a om ih gam ih khuadak siam, om siam ngel keh gamdangte’sila kisuakkik haklo ding hi, acih zel mah bangun tutung gambup buaina ah zongh gamsung minam citawm honkhat omdan khuahek asiam ngel kei leh a inntual uh galphual suakin minambup kizunglotna atungthei ding khuahun hong tung hita hi.

Tua bebek lauluat manin lah kalsuan khiat ngamna (Risk) lakkul lo cihna zongh hipah samlo zel hi. Leitung a galthu siam Sun Tzu in bel, ” galsiamna tatak bel gal peelsiam a galzawhna hi” na ci a, amah teekteek mah in, “athahat mahmah galte tawh na kido ding leh nangma zawh nading galphual teelsiam inla tua lai ah na galte kido pih zaw in”, na ci hi.

Galzawh nading galphual leh khuahun, galvan in sai mahmah ban ah geelsiamna ( Tactics) kisam zawlai hi. Leitung ah koimun bang hun hita leh gal kidona a om naak leh supna leh dongtuahna pelhtheih hilo hi.

Sepkhiatna leh tuah ding haksatna thu ( Risk) omlo olnotak tawh lah leitung gam leh minamte suahtak nading hanciamna ah kipeel thei ngeilo-in vandawn pan Pasian in khiatsuk ngeilo zel hi.

Bangbang ahizong hangsan mah bang pilvang khuadaksiam ding kisam a, tumasalopi khekhuan nop zilzial zongh lem tuanlo ding khuahun hong tung hita hi.

Maban Thuluanzia

Tutung lametna azo alel ding 1990 kiteelpi khit buaina dangdangte sangin mipi lam pan gualzawhna ding lametna tamzaw sa ing.

Ahih hang azo alel ding lungsim deihkaihna kihello alangnih tuakin 50% koih ing. Mipi in tu a dinmun ih manawtpih zawh suak naak leh mipitha bek tawh zongh kimualsuakzo suak ding hi.

Gamsung mualmi thautawite hong kipan tatak leh tu aa zah thum bangin lamzang zawkan ding hihang. Gamdang panpihna athu leh ala bel mipi lam pan 75% tawh tuni ciangciang akizo-in tuat ing.

Gamdang gamliante’galhuhna avui atang bel 25% ah lametna koih phot ing. CRPH leh gamdanglam thuvan palaite’ kimawlsiamna ban ah muhkholhna in thukawng tampi hong kiheksak ding hi. Bob Tuangpi