Galkap Willy Tony leh Meivak

Galkap Willy Tony leh Meivak

Galpi nih na lai in England gamah buaina khat om hi. Tua buaina pen meileng khatin galvankoihna innpi taihkham a hihman a hihi. Japan te bomb khiatna hangin meilenglam kisia hi. England te’n meilenglam bawlpha kik ahihmanin meileng a pai masasa khawlsak uh hi.

Meileng a khawltheih nadingin galkap khat in meileng hawlte muhtheih dingin a meivakbung a vikziahziah den a hihi. Meivak a kivik ziahziah a muhciangin meileng hawlte in meileng a khawlsak uh a hihi.

Zankhat mittaw galkap Bil Ton in meivak vikdingin duty ngah leuleu hi. Tua nitak huih nunglua a hihmanin a meivak sukmitsak hi. A mah mittaw a hihmanin a meivak a mihlam theilo hi. Zantha pai vukkia ziahziah, guah zong zu in huih zong nung hi. A mahzong khuadamsalua, lingkeuhkeuh ma taleh a duty a hihmanin zingkhuavak dong meibung viksuak hi.

Zingsang ciangin galkap ukpa in Bily Ton sam aa ‘banghangin na meivak viklo na hiam? Tu zanin meileng khat paisuak in galvan koihna mun phukha in kisiatlawh hi. Na ginatlohna hi, sihdan a ngah dingin na kilawm hi’ ci hi.

Bily Ton in ‘Sia aw, zantawn tung ihmu lo in, lusu lo in ka duty mah hi’ ci in thum hi. Ahizongin a thugen te a kimanna omlo a hihmanin sihdan kipia ding hita hi.

Tua laitak putek khat hongpai in galkapbu pa kiangah ‘Sia aw, zanni tak meibungsungah a meivak mit hi. A mah a mittaw a hihmanin meivak a mitlam theilo hi. A mah a hihleh zantawntung ding mahhi’ ci in a gen ciangin galkap bu pa in hehpihhuaisa in suahtakna pia hi.

Lesson:
Hauhnop luatna, minthannop luatna, pilnop luatna, thuneihnop luatna, huaiham luatna leh kiphatsakna te in mihingte hong mittawsak hi.

Bangzahtak in nasep na hanciam zongin, bangzahtak na hau zongin, bangzahtak na pil zongin, bangzahtak septheihna leh vangliatna na neizongin na sungah itna, midangte hehpihtheihna leh ki niamkhaitna meivak a omkei leh a mawkna mah a hihi.

Na meivak taangsak kik in. Tuaciangin nasem in. Na sepsunsun na zo ding hi. Siamsin Library