USA, Florida sanginn khatah thaukikap, mi 17 si, 15 zato ah lum

USA, Florida sanginn khatah thaukikap, mi 17 si, 15 zato ah lum

USA, Florida State sung aom High School sanginn khatah Wednesday ni in thau kikapna piangin mi 17 si cih AFP pan kiza hi. Tua sanginn pen Florida, Parkland khuasung aom Marjory Stoneman Douglas High School ahihi.

Thau akappa pen kum 19 aphakhinpan pasalkhat hi a, hih sanginn ah akahngei sangnaupanglui khat hi ci’n Local Sheriff te’n genkhia uhhi. Semi-automatic Riffle thaukhattawh sanginn sungah aphialkapgawp ahihi. Fox News te genna ah athautawi pen AR-15 Rifle hi a, thautang pen simzawh lohding zahin tampitak pua cihi.

Broward County Sheriff Steve Israel in agenna ah thautawh aki kaplup athuakte pen sangnaupang leh adang ulian uhamsa pawlkhatzong kihel uh cihi. Ahi zongin tua ulian uhamsa tepen sangsia ahihleh ahihlohpen ki gencian theinailo cihi.

Thautawh kaplup athuak asi mi 17 te lakah, mi 12 tepen Building sungah aki kaplum hi a, adang mi 2 pen Building apualam ah akikaplum ahihi. Mi 1 pen zato ah akipual laitak in lampi tungah asi hi a, adang mi 2 tepen zato atunkhit ciangin asi ahihi.

Asi mi 17 banah aliam bekbekzong zato akipuak mi 15 pha cihi.

Thautawh akappa pen amin Nikolaus Cruz kici a, palik te’n mankhinta uhhi. Hih Marjory Stoneman Douglas High School sanginn panin gamtat hoihlohna “disciplinary reasons” tawh sanginn panin aki hawlkhia ahihi.

Hih thaukappa ii a website leh Social Media zattezong ki sitsak a, Posts pawlkhat tepen lungkhamhuai mahmah hi ci’n Broward County Sheriff Steve Israel in genbeh hi.

Hih Marjory Stoneman Douglas High School omna Parkland khuapen Miami City panin 80 km bang agamlatna aom khuakhat ahihi. Aliam pen Report akigen masakna ah mi 20 pan 50 kikal bang phading kici a, ahi zongin akician in ki pulakkik nailo hi.

Video: Multiple deaths were reported Wednesday at Marjory Stoneman Douglas High School in Parkland, Florida

United States sungah sangkah kipat, sanghon khitzawh thau kikapna kiza zelzel hi. US gamsungah kumsim in thautawh mi 33,000 bangin sihlawhden cihi.

Hih sanginnsung thau kikapna hangin President Donald Trump inzong ama Twitter tungah dahpihna pulakkhia hi. America gamsung aom sanginn te ah sangnaupang, sangsia leh akua mapeuh in lauthawng cihbang omnawnlo dinghi ci’n gelhkhia hi. “No child, teacher or anyone else should ever feel unsafe in an American school” Bangci vaihawmsawm ahidiam cihbel ki genbehlo hi.

2013 January khapan kipan US gamsung aom sanginn 283 ah thau kikapna piangkhin hi ci’n Non-profit Group khat ahi “Everytown for Gun Safety” te’n genkhia uhhi.

More: USA, Los Angeles sanginn ah kum 12 aphapan numei khatin thaupua in sangnaupang mi 4 kapliam

2012 kumsung inzong Connecticut, Newtown khuasung aom Sandy Hook Elementary School ah thaukikapna huaisia mahmahkhat piangngei in, sangnaupang 20 leh ulian 6 in sihlawh uhhi. Sawltak #zomidaily