Feedback: Aki manawh Diamond Jubilee; Tedim Sanginnpi

Feedback: Aki manawh Diamond Jubilee; Tedim Sanginnpi

Zomi Uu le nau akua mahpeuh,
Tedim Sangpi Diamond Jubilee (Kum 75) bawl ding zong tu aakipan ih lungsung ah geelna leh ngaihsutna ih nei pen Lungdamhuai saa ing. Falam Sangpi Diamond Jubilee (Kum 75) pen Falam High School in 1981 (1906-1981} kumin na bawl khin aa, a Diamond Jubilee Magazine laibu bang hoih mahmah leh picing kasa mahmah hi. En’ 1998 kum in Tedim BEHS No. 1 Sangpi Golden Jubilee (kum 50) ih bawl pan hi.

Baptist Mission te in, Falam khua ah 1906 kum in, Kawllai Kawlkam a kisim Baptist Primary School hong uhhi. Falam te in asangpi Jubilee a bawl uh ciang in, 1906 kum aa, kihong tua Baptist Primary School pan simtoto uh aa, tua sang pen 1948 kum ciangin High School hong suakto ta ahih manin, Falam High School Diamond Jubilee pen 1981 kum teh ana bawlta uh ahihi. 2006 kum ciangin sangneih zawh kum 100 cingta aa, tun’ sang neihzaw kum 112 acing hita hi. Ei sangin kum 42, sang (School) anei masazaw dan khat hong suak mikmek uhhi.

Tedim khua ah 1902-1904 kum in American Baptist Mission te’n Kawllai Kawlkam aa kisin “Baptist Primary School” na hong uh hi. Ahi zongin,sangnaupang omlo ahih manin, 1905 kum pan zom nawnlo uhhi. 1909-1925 kum ciang Mikaang kumpi in, Govt. Primary School hong’ hoong uhhi. 1925 kum pan in, Govt. A/V Middle School suak aa, 1947-48 sangkum akipan State High School asuak to ahihi.

Ataktak ih sangpi Golden Jubilee bawl ih makai te in natuat khial uh hi kei leh 1998 kum aa Golden Jubilee bawl phingphing ding hilo aa,, 1962 kum in Tedim No.1 BEHS Gloden Jubilee, 1977 kum in Diamond Jubilee, 2002 kum in Centennial Jubilee bawl ding ih hizaw hi. Tun’ ih sang neih zawh kum116 acing hizaw hi. Bangcih nawn tathong ding.

Magazine bu ih bawl ciang in ah zong, meltheih tanau te leh lawmte angvanna, mai-etna (favoritism), lai-at pa deihkaihna (Author bais) omlo ding thupi mahmah ding hi. Mi khat lai-at dan, idea or a lai-at hon khat ei attawm’ theihtawm bang aa zatsak guksak lo ding. (Plagiarism) Zatsaklo aphat mawh leh tua lai-atpa or idea neipa tung pan phalna ih nget man’ kei leh zong, Footnote or munkhat pepeuh ah tuapa’ aa hi cih pulakna nei hamtang ding.

Ihsepna khat pepeuh a kigel bang aa, maa ihtut ding. (Gtn; Golden Jubilee hall pan Golden Jubilee Wall suaksaklo ding)

Khupkhan Thang Taithul
Norman, Oklahoma
U.S.A.