Federal State leh Zomi ~ Pu Zokhai

Federal State leh Zomi ~ Pu Zokhai

Sisanpih Ngaihteng, Zomi leh Zogam I-cih laulau-pen gen nuam mahmah kisa-a, ahizong-in I-gengen khitsa mahbang-in “Zomi-in bangciang huam” cihthu a-Zomi kicicite’ sung mahmah-ah kimin naailo ahihman-in tua-tawh akinahvawh ding buaitheihna thunuazuui enpak lehang-a, thei lehang hoihding-in ka-ummawh mahmah-hi.

Federal State cihciang-in Australia Gam-a federal system themcik enlehang:

State khempeuh-in amau’ dialpeii ciat-tawh, amau’ thukhaam (law) ciat-tawh om diimdiam-a, Gamseh Gamukpawl (GG) State Government neiciat uhhi. Tuateng-tawh mapangkhawm ding-in Australia Thallohpi mun-ah Australia Gamukpawl Federal Government (The Commonwealth of Australia/Australian Government) om-a, gam thukhunpi (constitution) vaaisai ahihi.

GG: State Government or Territory Government nuai-ah Tualsung Ukpipawl Local Government om-a, tualsung-a tualpawl communities tuamtuamte khuituah-a GG leh tualpawlte’ kaal-ah palaai panmun la uhhi. GG-in ama’ uknahuam gamseh state sung-ah thuneihna nei mawkmawk beklo-in tua gamseh sung-a milip’ khantoh nading siamsinnalam, tualpawl zuunnalam, cidamnalam-a kipan tualleenphung society’ kisap khempeuh kansuut-in a-awng khempeuh ahuk nading anasep ahihi. Atom-in, Laaitui Khua-a akisam bulpi-pen Laaitui Tualsung Ukpite-in kancian-in GG-ah puak-a, GG-in GG’ budget pan-in a-awng hukna bawl-hi. (AU-ah atuam-in Kumpinu Elizabeth II taangmi ding-in thuneihna anei Governor-General neilaai uhhi).

Federal I-cih laulau thapaai-tawh kisai-in hih ahampi-a federal system enpak lehang:

Zogam I-cihcih koiciang huamsak??? Chin State buppi ahuamsak I-hihleh “Zomi, Zogam” cihcih kuul nawnlo dinghi, zuaupi ahihi. Chin State cih nungsang-in Chin akici-nuam mahmah honkhat om bekthamlo-in Kawl Gamukpawl sung-ah politics thuuk bunhzaw-in luut khin-uh ahihman-in Gamseh Khuapi Khalkha (Hakha)-mah hong hito lelding-a, GG sung-ah Laimite-mah hong innbul toto lelding, amau’ politics siamna-tawh makaai tutphah apiakpak Zomi penglam uital pawlkhat-tawh hongpang laaiding…. Koi-ah I’ Zomi I’ Zogam phulaam zonawn dinghiam!!!!

Tua ahihteh, “Zomi Zogam” I-cihcih-in Chin State buppi ahuam ahihleh haiitat nawnlo-in Chin minpua vet-in Laimite’ sang-a amuiibunh zaw-keiphial zong-in amau zah beek-a politics kimawl hamtangding ahihi, tua hikeileh Federal System maantak-tawh Kawlgam hongki uk takpi-leh “Zomi, Zogam” I-cih lawlaw-pen abeibei hilelding, GG tuhzo loding, banghang? Chin State nuai-ah om Zomi hiven, Zomi-pen Chin State sung-a ethnic group neuno khat hilel lomaw hongkici lelding-hi, maan mah-hi.

Tua ahihman-in Zomite’ politician akisa, Internet sung-a akimu “Federal State’ ading kum 20 bang ado” cih maimai tekhawng khasiat-huai mahmah lel-hi. Kawlgam sungbek-a akivialvial political platform ciangciang-tawh Zomi I-kimawlpih peuhmahleh Kawlgam-in Federal system hong zangh takpi-leh State Govt. -pen Chin State Govt. honghi peelmawh ding ahihlam atheilo bangliang-a omding dahhuai mahmah-hi.

Lahpakding-in, State dialpeii (flag) eleh??? Chin = Zomi aci veve I-hihleh Federal system-tawh kalsuan takpi lehang koi dialpeii zanghding??? Singnuaipawl pan-in enpak lehang CNF/A, ZRO/A, ZIA akoipen’ dialpeii zanghding? Hih bekbek-tawh kisualna piang lelding dinmun… Political party-ah WZC, CNP leh ZCD.., ZCD lah Tedim Tonzaang huamteng bek-ah cileng??? Siamsin dialpeii lah siamsin dialpeii hi-a,….. Zomite-in nagihsutna kician nei meello simsim hileng kilawm-hi. A-Zomi huamna mahmah-ah kitukalh laailaai, dialpeii uutbangtek bawllaai, koi-ah bangci State Govt. tuhzo ngeiding?

Hihbang-in Zomi leh Zogam huamciang sansaat theilo I-hihleh Kawlgam-in Federal system azatding bangziak-a lunggulh-huai laaizangding???? GG-ahlah tuhzo loding, banghanghiam cihleh Zomi minpua lingleng I-hihteh…. Democracy bang-a kimang nawnding? State khat sung-a ethnic neuno khat’ rights cianglel-maw I-lungdeih? I’ lunggulh? Democracy honghi leh-a, tuciang dinmun-tawh Zomi I’ kalsuan lehbel district nangawn angah zolo, bangmah acih theilo leltak khat-in “community neuno khat’ rights” ciangbel ngahsaam veni hang-in, Chin State Govt. nuai-ah grant ngen peuh-in laai gelhgelh lelding ciangmaw????

ZCD Lutangpipa-in, “amau-tawh I-deihna, I-zia I-tong kibang theilo ahihteh…….” acih lungngai lehang tu-a ZCD, WZC, ZA, GZA, ZYA, ZI cihte’ muituum target bang peuhmah ahitam? Federal kiukna hong kizanghleh ka’ gelhsa mahbang-in Chin State Govt. nuai khawng-ah “Ko Zomite-in hihbang project nei-ung….” ci-a grant/fund angen daldal ciangding longal bangmah hihtheih omkei mataw???

Tua cianglel ahihlehbel Pu Nang Lian Thang te Pu Kip Kho Lian te tawsawn meengmeeng-a amau’ nung-ah kithuapto zihziah lehang milip-in hun sawtpi’ ading inzong nuntaak gimnam zawlaai dinghi cih kei’ muhna ahihi. Chin State-tawh kizom kipawlna leh vaaihawmna khempeuh-ah abullam tuhpah, Chin State Govt.-ah thuneihna akimciangbeek ngahsawmpah, hihpen political mahmah zawlaai ding-a, thuneihna tungpan minam damdam-a aki promote theiding hilaai-hi.

Tua ahihleh Chin-mah athupizaw mahmaw???

Kei’ uplehsaanna-ah, “Zomi Zogam” I-cih ciang-in Chin State sung-a namneu khempeuh ahuam daan-a asehvet I-hihleh “Chin” kicih pahding hilel-hi, Zomi-tawh Chin laihsawm cihkhawng azumhuai hilel-hi. Tulaai tak-a Chin State lubuukpi Hung Ngai pahphot-in Zomi akici nuamdiam? CNF Supreme Council acih kiaikuai sung-a upate eleh Zomi akici nuamdia? CNP upate eleh??? Zumhuai lel-hi. “Chin ka-cihteh Zomi kacihna” cih maimai-khawng zumhuai mahmah lel-in ka-mu-hi.

Zomi cihpen minam khat ahihi. Ethnic neuno khat cianglel hilo-hi. Leitang anei, ngeina kiptak anei, tualbiakna-tawh akhangkhia, gaal-ai sa-ai namte, zunung, khuado namte, ton leh laam anei namte ahihi. Hihbang minam alian akip khat ethnic neuno khat bang-a sehtheih hilo-hi. Hih mite’ teenna koiteng??? Chin State Saklamkaai leh Manipur State Suahlamkaai ahihi. Kawl leh Vaai gam-a phelnih gawmtuah pahni ci-kei peuhmah phot-hang!

Ahizong-in Kawlgam politics sungpan Zomi State kaihkhiat theihding, atom-in Chin State-pen State nih-a khending State Saklamkaai teng Zomi’ thuneihna nuai-ah omding cihthu ahihi. Tualo-in Federal ahi-a Democratic ahizong-in Zomite’ phattuamna puungpuungding omlo-hi. Autonomous District -tawh kipan photdingmaw, Wa State bang-in Zomi State sualpah dingmaw??? Hihbang lo-in politics daankhawng I-gen kuunkuunte azumhuai, angsung ciangbekmah-in ka’ seh lel-hi.

Minam I-gen ciang-in minam bekmah, tua minam’ minam bekmah akigen hi-a, adangte’ khasiattheih omlo-hi. Zomi cici pong-in Chin nuai-mah ahihkeileh Chin = Zomi cihcih khawng haiivaai ahihlam I-theih hunta-hi. Zomi akicici hontang teng-in Chin acihteh Zomi, Zomi acihteh Chin ahih leltakleh thutuam peek-a Zomi cih tantan akuul hilo-hi. Lungsim-ah Zomi cici peuhlel-in Kawl Gamukte’ khutpan satanh ngah zawh nading Chin min-tawh mapanpah liauliau lelding pilvaai zawsop-hi. Tua ahihman-in Zomi I-cihteh Chin hilo, Chin State Saklam minampi khat ahihna saangkip photding, tua minam’ gamlei-ah tua minam-in thuneihna aneih nading, tua hileh Democratic leh Federal system te-in Zomi phatuam sakthei panding ahihi.

Tualo-in, Kawlgam-in democracy maantak-tawh hong kalsuan ngialleh State Govt.-pen Chin-mah honghi lelding-a, Zomite-in tua Chin State Govt.-ah kisapte angen duakduak ciangbek mah-tawh nitumto lelding cihthu thumaan ahihi.

Tua ahihteh na’ Zomi zaigawpsak kuulkei, sakhi manlo ngaltang tumm kuulkei, baangkua vaaihawm zolo-in mi’ baangkua vaaihawmsawm kuulkei, I’ baaangkua ahi I-Zomi cidamsak-a, I’ leitang tung-ah thuneihna I-neih zawhding muituum-a I-neihding ahihi. Tu laaitak Kawlgam democracy amanawh hun ahihman-in hih hun sung-ah I-phuut zawhkeileh atompen khang khat-mah hongki sotto dinghi. Tu hun-in aneupenpen Zomi Autonomous District ciangbeek I-ngah zawhkeileh I-haamhaam, I-ciakciak akimanna neilo, amawkna suaklel dinghi. Aneupenpen hipan-a, minam kician khat I-hihna-tawh State khat asaatkhia theiding, State khat anei ngiatding, State pan-in gam khat-a adingg theiding-a Pasian’ hong piansak ahihi cihthu ka’ uplehsaanna ahihi. Zomi Pasian’ Thupha! Zokhai (Written on 31 July 2013)