Eimi namdang pasal neite ka muhna

Eimi namdang pasal neite ka muhna

Namdangte mah bangin eimi numei pawl khat in zawng namdang pasal nei uh hi.Hi thu pen kikham keei theih zawng ahih lohna ciang awm hi.A taangpi thu in eimi namdang pasal nei te pen a meel uh zawng ahoih mawh lou leh zawng a pil /a siam moh lou ahih man ua a nei awm uh hi.Namdang pasal nei te pen i ngaihsut ciang eimi tawh teeng te sangin kip lo zaw hamtang hi.Kikhen pen baihsa zaw hamtang uh hi.Lawm ki ngaih nangawn namdangte tawh pen itna tak tak sangin leitungnawpsakna lam ut man khawng hi zaw nuam hi.

Eimi nam dang pasal neite i ngaihsut ciangin ei level sanga sangzaw nei ki awm meel lo mawk hi.Ei level sanga niam zaw vive leh pawlkhat ei level ciang zawng awm sam hi.Vai lambawl te khawng, Kawl galkap te khawng leh Meitei singaat te khong a tam pian pen hi lel hi.Khuapi lama namdang pasal neite nangawn pen tua zah pi hi tuan lo mawk uh hi.I namdang makpate i et ciang eimi sungah mi muan huai keei awm lua lo hi.Neek leh taak zawnna lam ah zawng kingak tak keei nading liang awm zo lo uh hi.Zu kham kham thei peuh hi nuam citciat se uh hi.Kawl galkap gina khollo leh Lusei tangval zukham kham kham khat nangawn in eimi nungak a hoih sim sim hong tuah khiat sak giah giah zou mawk uh hi.

Eimi ahi lo namdang pasal neite ngaihsun leu leu dih ni.Ei Zosuan sung mah ahi i kiim naia awm i muh leh i theih khak Lusei numeite bang ngaihsun leeng; Amau zawng namdang pasal nei pen tam mah mah uh hi.Ahizongin amau namdang pasal aneih uciang, neek leh taak zawnna ah a mau buai se kulloa kingakna taak namdang pasal nei se uh hi.”Sum ngah ngah hmeltha”(sum hau peuh melhoih) cih pen thupi in nei ziau lel uh hi.Mi lian pipi IAS ciang khong nangawn ngahzo mawk uh hi.Tua bek tham lo in a pasal uleh a tate uh amau pau zuisak zo zawmah lai uh hi.

Eimi namdang pasal neite a tamzaw pen mi nuamsa lua awm lo uh hi.A nungak lai ua melhoih mawhloute nangawn hong nupi uh ciangin neek zawng pipen hong hi ta uh ahih manin hong keu keei liang uh hi.Pawlkhat khatte bang a pasal te un vua vua zaw lai deepin lingsim gimtakin awm uh hi.Hih numeite in eimi sungah pasal amau tawh kituak leh amau sanga level sangzaw nangawn muzo dingun upmawh huai hi.Hinapi bang hangin namdang pasal tel sese uh ai tam?Hi pan bang kimu thei hiam cih leh eimi ten namdangte tung et zaw pian mawk hi hang.Namdangte kithupi muh deuhse mawk hi.

Zomi nungak akuama ciat no leh no kiniam ngaihsut tuan kei un.Namdang ahihman un mi thupi ngaihsut ding hi tuan lo hi.Hong nawpneh zaw khading uh hi,na lungsim uh sangsak un.Namdang pasal neih pen ahoih loh lam anei khinte dong un.Lusei lasiam Tetei Ralte (celebrity) in a genna namdang tawh kiten pen, “buai neuh neuh a tam” ci se hi.Amah zong Khasi te tawh kitengin lungkim theilo in kikhen kik uh a tun Mizote khat tawh kitengkik khin uh hi.Namdang pasal nei kei un a ci khin kei zong ka hi keia, ka gen nop pipen namdangte nawpneh dingin nou leh nou ki neuseek kha het kei un.Na lungsim uh sang sak un,tangval melhoih pipi leh sumhau mah mah te khong ngah zawh loh dingin ngaihsun tuan kei un.No adingin ngaihsun thei unla ngah zawh sawm zaw un!Takkheh zoliate…..

N.Pau Tun Thang