Editor hangsan leh cilgil kisam ~ Francis Lamthang

Editor hangsan leh cilgil kisam ~ Francis Lamthang

“Ka ha a na. Ka pa ha a na. Haza va la ve. Sih ah sakhi a tai hi.” …ci in ih neulai in Zolai sangah Zolai simbu sung en in ih awng ziahziah hi. Tuhun khangthakte sungah “Na Zolai sinte uh bel nasia lo thei lua, maizum huai lel!” A cici pawl khat om uh hi. Kei muhna ah khangthak ten nasia na sak loh uh hangin ko hunlaiin tua bang tawh hong kipantah ahihmanin numei naupang in Zolai maan takin kisim thei in kigelh thei hi.

Tua hunlaiin ka Zolai gelhziate uh kihual a, kuakua in Zolai a gelh zongin nuam takin kisim thei hi. Ka Zolai sinte uh a nasia lo hi kei, a Class tawh kituakin Subject dangte zong tuni ciang dongin 1+1 pan a kipanto vive hi lel hi.

Tuhun khangthak sungah mipil leh laitaan sangpipi a nei honkhat in “Ken Zolai sim thei lo. Ken Zolai gelh thei lo ..” cici ta uh hi. “Phadawm ei, Zopau thei keng nong cih loh” ka cih hun tampi tak om hi. Bangbang ahizongin Zomi khangthakte a kamsia hi. Bang hang hiam cileh amau hun sungah kumpi in Zolai sinsak nawn lo hi.

Tua sangin a kamsiat huaizaw thu khat ah ama Zolai siam loh pen “Sanginn ah Zolai hong kihilh lo pi” cih ziau tawh a khawl bawl uh ahihi. “Sanginn ah ih Zolai hong kihilh kei zongin ih Zolai pen ih minam lai leh pau hi, ih theih loh phamawh hi” cihna mel ih theih loh pen haina lianpi khat ahihi.

Zolai a gelhgelh khangthak sungah pawl khatte leuleu amau ut dan tek in gelh uh a, Zomi pen Zoomi acitawh, Tedim pen Tediim acitawh, G malnih munkhat ah a zangh thuah tawh cih bangin om gawp ta leuleu uh hi. Tua banga Zolai ih gelh gawp ciangin ih Zolai a semnen leh belmang a zuut ih suak a, lamkhat panin khatsiat huai kik hi. Tuhun ciangin ih Zolai pen ih mipilte in ut bangbang in ong hei lua liang leuleu uh ahihmanin zukham a bang hi ta hi.

Lampi dungah tengah hawi dengdeng in, kipumpaih niloh ta hi. Ih Zolai a phongto kik dingin Editor hangsan leh cilgil, Zolai sin a, Zo Laisiangtho a sim den khat kisam hi. Tua bang ahihkei leh ih Zolai pen a tuukna mun pan thoto kik zo nawn lo dinga, Zomi sunga ih laihawm neihte Zolai a kigelh tektek a kigelhzia hong kilamdang semsem ding hi.

Zolai tawh Magazine a kibawl khat sungah Zolai tawh a kigelh tektek a sim nuam leh haksa deuh om toto lai ding hi. Zomi ten Editor hangsan leh cigil kisam hi hi. Zolai leh Zopau nungta den ta hen. Zomi Quavadis