Dongtuak kawmkal ah sin theih ding thu manpha! ~ Khat Thang

Dongtuak kawmkal ah sin theih ding thu manpha!

U aw,
Na damdam uh hiam? Hih tengah ko omna kimteng bel siatna tawh kidimin, kithehthaang gawp ta hi. Ka mitsi leng, misi luang bebek ka mu a, ka mit hong leng zong misi luang bebek mah ka mu hi. Nisim in ka vekpi-un, ni khat nai 20 na kasep uh kul a, hi thei leh ni khatin nai 48 bang a om thei hi leh ka ut phial mawk hi. Tua hi leh dongtuakte huhna tampi kisem zo ding hi aa…

Mei kingah nawn lo ahih manin, nek le dawn ding tui nangawn a beibei ta dinmun ka hi ta uh hi. Kumpi lam panin dongtuakte mun dangah puak ding thupiakna bangmah om nai lo ahih manin, ka hih theih bangbangin dongtuakte ka kem phot uh hi. Tutaitak lian ka omna pen Fukushima khuapi hi. Nuclear mei thapiakna phualpi tawh bel 25 kilometer kigamla lai ung.

U aw, hun om hizen leh ka lungsim sunga hong phul khempeuh suahkhia-in, lai hong at nuam ing. Kong gennop nak tam hiven. Dongtuak haksat hunin, hiteng a gammite khat le khat kikhual zia, kihuh zia, a gamtat luhek zia tenguh at leng laibupi khat bang suak zo ding phial zahin thupi lua mahmah uh hi.

Dongtuak mite pen bangmah cilo bangzahin hoih tak om hithiat thei mawk uh hi. Duhhop, huaihamna cih bang a nei kilkel lo zahin a lungsim uh kikem zo uh hi. Tua huhau in hih a suksiat lua mahmah siatna pen upmawhna sangin, buai luat kul lo in kikem zo hong suak hi. Ahi zongin Kumpi lam panin a kician le a manglang thei pen gelna hoih hong neih kei vua leh nipi khat sungin bangtan siatna in hong behlap ding cih kigen thei lo dinmun ka hi ta uh hi. Kumpi lampanin bel zatui, zaha, nekledawn ding vanleng tawh hong puak sam uh hi napi, tupi sunga ci haikhat sawh bang bek hi-in kicing peuhmah lo hi.

Tua leh U aw, ka lungsim hong lawngkha lua peuhmah khat, Japante naupang khat hizen veh aw, ei mipicing khinsate zah in, mihing khat hihna tawh bangci gamtat ding cih thu hoih phatakin hong hilh mawk hi. Zanni tawntung Primary sang Inn khat ah duty ka lut pen, dongtuakte nekledawn ding huhna hong kipiate a hawm sak ka hi hi. Nekledawn ngak a kigual mi a tam dan bel, kawi tampi kithuapin kingak dimdiam bek hi. Tua sungah T-shirt leh bombi tual teng naupang kum 9 khat ka mu kha hi.

Khua hun vok mahmah lai, mi kigual tampite nung lam pek ah om lai, a ma hun the nekledawn hawm ding bei kha mai ding cih ngaihsun kha ka hih manin ka va hopih leh, “zinling hun laitakin, ka Sang Inn uh dol thumna pan ka dak suk leh ka Pa in hong dawn ding a mawtaw tawh hong pai laitak Tsunami tuihualpi in ka Pa mawtaw a vuknelh ka gal muh hi” hong ci hi.

“Ka Inn uh pen tuipi nawl diak ahih manin ka Nu le ka naunu zong bel Tsunami tuihualpi sungah hong paisan khin dinguh hi” hong ci sawnsawn hi. Na meltheih tanau te ee? ka cih hangin naupangno gal khat lam kihei in khitui luang in hong dawng nawn lo hi. Khua vot lua peuhmah ahih manin ka puan tungsilh suahkhia-in naupangpa ka silh sak hi. Ka puan ip sungah kei nek ding ka ngah anphel tun khat nei ka hih manin, “nau aw, hih an kei aitangin nang ne in, nang hun hong tun the anphelte zong beita kha mai ding hi” ci-in ka piak leh lukun in hong sang lungdamna zahtak pia in hong sang hi.

Anphel hong in a ne pah ding ka sak leh ne peuhmah lo-in, hua gal khat a mai lam pek ah nekledawn hawm ding kikholna bungpi sungah va khia vingveng zen hi. Ka khuasik mul hong tho sak zo hi. “Bang dinga nang ne lo-in ka khiakik na hi hiam?” ka cih leh, “kei sangin a gilkial zaw ding mi tampitak om ding hiven, ken wa ah va khia leng an hawmte in mi kim ngah theih ding hong hawm sak thei zaw dinguh hi” hong ci zen hi.

Ka khasiat hong suak lua ahih manin, ka khitui luang mi’ muh ding ut lo-in, ka lu ka heisan hi. A manpan lungsim, mipi noptuamna dinga, gentheih thuak ngamna cihte a thei le a zui zo dinga naupang kum 9 phapante dong a pahtah zo, Japan gammite minam lian, minampi a suah ding mah uh ahih lam hong musak hi.

U aw, na innkuan un na dam ciat un, ka nasep dingin hong ngak zel ahih manin tua zah cipak phot ni!

Nong’ it na nau,
Ha Minh Thanh (credit to original writer)

**Kong it, kong muan le kong zahtak Biakna Siate, a diakin GZA makaipite aw, hehpihna tawh I gamah I mipihte dongtuakin a om laitakin na kam uh hong hong un, na Pawlpi mite uh thu hong pia dih un, sumbuk neite, mihaute kiangah a cimawhte tawh nekkhop dawnkhop diamdiam dingin thu hong hilh tapeuh un.**

Tedim le Hakha ah antang zuakte in zuak nuam lo in sel phial uh cih thu ka zakteh ka khitui luang kawmin kong at hi. Genkhialh a om leh hong maisak un!

Khat Thang