Dong tuah hun ciang ~ Rev. Thang Van Lian

Dong tuah hun ciang ~ Rev. Thang Van Lian

Dong tuak, cih ciangin cihna ding dang om nawn lo, buai, haksa, nate a ngei bang nawn lo, cihna hi. Haksat hun ciang lawm hoih pente hong kidawk pan hi, cih thu om mah bangin tutung Covid-19 hang a dong i tuah ciang kua teng hong kidawk ding hiam?

2015 kum, tui khang leh mincim hangin dong i tuah hun lai ka phawk kik mahmah hi. Tua hun lai-in mi huaiham leh vanman khangsak khat leh nih a om sam hangin Pawlpite, kumpi, Hausate, CSO leh mipi pangkhawm ihih manin gilkialna leh cihmawhna hunhaksapi khat i kantan khin zo hi. Migilote hangin kilungsosak niloh loin thukhual teng in na hong sep uh ciangin Zogam a cidam hi.

Tu-in zong Zogam bek hi lo leitungbup dongtuahna in Zogam hong ban ta ahi hi. Pusuak lo ding, kikhumcip ding, vak khia lo ding, khut sil ding, kineh lo ding, mihon om khawm thei lo ding… cihte hoih mahmah hi. Covid-19 Emergency Committee khawng hong ding ziau thei uh ahih manin makaite tungah i lungdam mahmah hi.

Tua ban zomin a kisam mahmah lai Zogam sung a mipi a tamzawte dahna leh patauhnapi pen a Virus zong hi nawn loin nek tawm ding vai hi ta hi. Buhsihpi vai mah hong suak leuleu hi.

Hih bang hun laitakin meigong tagahte leh daipam mizawngte lungmuanna ding leh khamuanna dingin kua Pastor, kua Pawlpi, kua sumbuk, ulian leh kua kipawlnate kiang pan thu hong ging masa tam, ci-in ka zak ding kal ngaklah in thu ka na ngen hi. Hih bang dong tuah hun laitakin biakna Siate leh Upate, Pawlpi hizah a omte i bukcip leh eite tungah i biak Pasian a lungkim ding hiam, cih i ngaihsut tek ding deih hang.

Puak khop zang, nek khop lim… cih Paunak a nei Zomite ihi hi. Hawm siam nungta, nebum puk si, i ci hi. A hawm siamte hi-in vengte gilkial ta leh ei kia bek in buhsih leh aksa a ne ngam lo a kikhual minamte ihi hi. Paunak leh thupil i neihte pen Pasian’ thu i zak ma pek a i neih ahih manin nidang lai pek pan a thukhual mahmah minamte ihihna phawk ni. Ne khawm ni, phul khawm ni, nawk khawm ni maw.

Covid-19 hangin haksatna i tuah laitak Tedim khuapi leh khua lam a omte in na hoih sep ding vai khat hong hawm peuh le uh cin mundang a om na khuapih na mipihte un no bek hong nusia het lo ding a, na nung uh hong thuap pel mawh ding hi. Gilkialte anvakna, meigong tagah huhna, a haksa diak innkuante panpihna tuamtuam, cih bang nahoihte a munmun a ZYA leh biaknate in hong vaihawm un la hong sem ziahziah ta un. Kumpite leh gamdangte’ hong sawl ngak kei un.

A diakin tutung vai ah ei khua tek ei veng tek ah antang hangin lung hi mawh kei un, ci-in nek ding neilo takpite nek khat nek nih tawh huh ding hong kipan un. A ban ding Topan hong sik veve ding hi. Mipi kikhumcip sung kal 2 sungin a haksa takpi pawlkhat om ding hi. Hih bang hun ciangin kitaisan loin Pawlpi hat tata bucip loin i biakinn pan an hawm kidem ziahziah ni.

Pasian’ sumpi sawm ah khat tawh i biakinnte suai tui luanin i zem zongin hi bang hun haksa leh dong tuah laitak i mipite buksanin i kimuhmawh bawl leh Pawlpi aneipa leh cihtheihna hong piapa Pasian lungdam het lo ding ahih lam phawk ni.

• 1. Ko Pawlpi a neu pen, amau Pawlpi lian pen ci loin i vaipuak tek i phawk hiam?
• 2. Sumbukpite, antang zuakte… koi ah i om hiam?
• 3. Mipi in vote i piak uh Party te koi ah om uh hiam?
• 4. Saumang hoih nuai a ulian muanhuai kong neihte uh koi ah na om uh hiam?
• 5. Zogam a hausate leh ZYA ten bang teng sep ding hong sawm na hi uh hiam?
• 6. Gamdang a om Zomi Pawlpite zong i omna tek ah mipite‘ haksa lua leh dong tuak hong om leh bangci panpih kik ding, cih khawng kua Pawlpi teng in vaihawmna leh kiginna i nei ding hiam?

Dong tuah laitakin nang a bucip pawl hi zaw ding maw, ahih kei leh sep theih bangbang piak theih bangbang tawh ding to in mipihte panpih ding? Tuni-in khensat dih ni ei! Topan Zomite hong angvan den ta hen! Rev. Thang Van Lian