Donald Trump’ inn Elite Bomb Squad te’n cingding uh

Donald Trump’ inn Elite Bomb Squad te’n cingding uh

Nov. 21, 2016: US President thak Donald Trump in January 20 ciangin White House ah teen theihna ding leh President zaa let theihna dingin kamciamna nei pan ding ahih manin tua ma sung teng Florida khua-a Trump’ teenna inn US Air Force-te’ elite bomb squad Explosive Ordnance Disposal (EOD) sunga Flight of the 96th Civil Engineer Group kici ten cing ding uh hi. Hih Flight of the 96th Civil Engineer Group kicite pen EOD sunga a kimuang pen leh a buai pente hi a, Trump in kiciamna a neih mateng a inn cin’sak ding uh ci-in MODte superintendent Christopher Scott in gen hi ci-in Military.com. in suaksak hi.

Trump in President dingin a kamciamna a neih ni pen 2017 adingin pawi lian pen hi ding a, tua ma teng 96th Civil Engineering Group airmen team guk in cing ding uh a, hih team gukte pen mi 200 kiim pha ding uh ci-in Christopher Scott in ci hi.

Nung kum in EOD ten mission 480 ah nasem in kikuan a, President kiteel lai-in zong 96th Civil Engineer Group ten amau kicing den in kibuai mahmah hi ci-in gen beh hi. EOD sungah airmen kici mi 1,200 EOD disposal technician field ah om a, tua pen 1,400 in kikhan’sak beh sawm hi ci-in gen thuah lai hi.

EOD technician ah a tum theihna ding un airmen ten nasep/laisimbu leh training (curriculum) haksa mahmah a zawh uh kul a, hih curriculum ah seh thum suah seh khat bekin zo zo uh hi ci-in Christopher Scott in ci hi. 2001 panin Middle East ah USte galdona ah EOD technician 20 val in sihna tuak ta a, mi 140 in liamna tuak in, nak liam mahmah uh a, airmen 300 ten galdona hangin lungsim lam buaina leh khuak natna/liamna (post-traumatic stress disorder and traumatic brain injury) tuak ta uh hi.

Tua loin New York khuapi a Trump’ neihsa lak-a thupi mahmah pawl-a kigen Trump Tower pen lungphona nei ten nawk sawm den in, kisuam ding hi cih vauna om ahih manin tua kiim tung tengah vanleng a kilen’ phal lohna dingin “no-fly zone” kici kipulak a, White House ah Trump a teen lut dong no-fly kikoih den ding hi. Trump Tower tungah vanleng feet 3,000 feet sanga niam zaw leh tua building kiim nai 2-nautical-mile radius ah kilen’ phal lo hi. Source :Sputnik/ Thang Khan Lian