Dimno’ Nu laikhak – 17

Dimno’ Nu laikhak – 17

Dimno’ nu aw tutung kong laikhak bel kong kohnop thu pawl khat om ahih manin kong gen kal ding ngak lah in tuzan bang ihmu thei kei liang ingh. Tunung in nong laikhak uh zong na sim in ih khua khangno te om dan, gamtat dan te nong gen ciangin ka lungsim hong su kha mahmah mawk hi. Lai nong khak sim in thu hoih ahi a, thusia ahi zongin hong gen zel in maw. Ih khua thu nong gen zel ciangin ih khua aom mah bangin ka ki ngaihsun a ka lunglen zong nuam tuam mahmah hi. Thangpi leh Dimno’ ading in zong laikhak ka gelh sa om mah hi ven, ahi zongin bang lo teng tawh hong khak thei nai keng! Kong khak ciangin Thangpi min tawh hong khak sawm ing in, amah mah napia masa in a nau tawh na sim khawm hamtang leh ut ingh.

Tunung deuh nikhat kalawm zui-in mopawi khat kava sim hi. Hun bawl sungin pumkhat suak te lungdam pihna la tuamtuam Solo, Duet leh Pawlpi panin Choir khat sa uh hi. Tua sung ah ih khuapih te khat in lungdampih na la khat zong hong sa hi. Mipi te-in siam sa mahmah in khut bet ziahziah uh a, ahi zongin tua laitak in kei ka hih leh khut beeng cih tha dah ka lu na ngawn phong to ngam lo-in, lukun in ka nuai lam ka nga cip hi. Khut beeng zo lo, maitai zo lo pen kei bek mah ka hi pah tam maw! Dimno’ nu aw, a thu hong gen leng:- Hun uk pa in ih khuapih Pa lasa dingin hong sap ciangin keizong ka lawmpa kiangah lasiam ih khua pih Pa hangin kipaak leh angtang pih ka hih manin ama thu ka theih sunsun kagen pah hi. “ Amah pen ko khua pan hi-in ko khua ading leh Zogam adingin Laphuak siam leh Lasa siam mahmah khat hi. A la phuak tampi tak zong nunta in tudong mah in atul thei nai lo tampi tak om hi. Tua bek hilo in solfa zong siam ahih manin kong zin ma-in ko zong khua ah La hi ta leh Solfa hi ta leh hong hilh in, mun dang ah zong solfa hilh dingin zin kawikawi thei zel hi. Pawlpi sung ah zong La lam ah hong makaih in, amah hangin Association ahi a, gambuk Convention ciang dong ah Pahtawina Letsong tampi tak ko pawlpi in ngah in, ih gam sung bang ah ama hangin ko khua te mi tampi tak in hong thei tuam in, ka angtang pih mahmah uh ahi hi. Nang zong na theih sa mah bangin ko khua pen Lasiam khua te ci a hong kigen na zong amah mah hanciam na tampi tak mah kihel dingin um mawh ing,” ci-in kagen hi.

Ahi zongin lasa dingin ih khuapih Pa mipi mai ah hongpai in tom-cing in hong kigen a:- ‘kei pen kamin Pa***cih pen ka hi a, tu laitak Port Klang ah nasem in, Kawlgam panin ka om na, khua pen Tedim Gam, **** Khua pan hing,’ ci-in mipi mai ah hong ki metset mawk hi. Mipi te’n khut betna apiak ziahzaih laitak in kei kai leh den a konggen sa mah bangin maizum in kakiim kapaam zong en ngam lo-in, kun cip ing. Khanglui te’n ‘ Zum leh Saili a si omlo ” acih sam hangin asi te zong keisang in a gimzaw lo tampi tak om dingin um ing.

A lasak man ciangin kalawm bangmah paupih kuppih ngam nawn lo-in, hun tawp dong maizum leh kisuang in ka omcip hi. ‘Vak sese lo-in inn ah om hithiat leng maw’ ci-in kei leh kei ka ki mawh sak tha pai hi. En ve Dimno’ nu, kalawm in kei bang ci bangin hong mu-in, hong ngaihsun mawk ding ai tam! Mipil, Misiam, Mi mintang khat peuh aom leh ka khuapih te hi ci-a agen pahpah ding khawng hong sa tam maw!

Mi pawlkhat te ahauh a liat uh, a pil a siam uh, a minthang uh ciangin a khua atui a daipih ngam lo, a gen ngam nawn lo om in, pawl khat te leuleu ki kholhpih gige, lawm tiktek te khawng aki manngilh bawl zong om hi! Pawl khat te a hun zui in kigen thei leuleu mawk uh a, khamtung mi atam na mun ah a khamkhua gen in, zanggam mi atam leh zangmi dan mah in ki gen leuleu hi. Hih bang kong gen ciangin ih kham khua lui pen thupi sim loh in om tuan peuh mah kei-in maw! Khat vei leh lah khamtung mi in kigen a, khat vei leh lah kawlzang mi in aki gen akhua agen lo, adai pih ngam lo te om dan hong gen nuam hi zaw ingh.

Dimno’ nu aw, milak ah napai ciangin kei bangin maizumna thuakkha lo-in, ‘mikhem na suak khak loh na dingin kampau, mukpau ahi zong, omdan khawl dan ahi zongin pilvang tak in om in maw! Tua dan a khat vei leh zang mi in, khat vei leh khamtung mi a aki gen kawikawi te hoih kei zong aci hi tuan sese keng. Amau zong amawh sak hi tuan kengh. Ahi zongin na lawm te, ih khuapih te khat peuh hong pil in, hong hau in, hong minthang’ ciang ei peuh hong mangngilh thei in, ih khua khawng zong milak ah hong gen ngam nawn lo thei ding ahih manin tua bang hun na tuah ma-in ki ging khol sa-in na om ding hong gen nuam hi ingh. Khat vei teitei tuak ding na hih manin na kigin kholh theih khak ding leh ci-in hih laikhak zong hong gelh hi ingh.

Ahi zongin e’n bel Kawlgam sung panin ih khuamin bei in, hih ih teen na Leitung ah om nawn lo-in amai mang phial zongin ih pianna ih khua mah zumpih in dai pih ni maw, Dimno’ nu! Vantung ih tun ciang zong Pasian mai ah ding in hong ki metset sak leh zong ei innkuan teng in ih khua mah gen lai ni ei, Leitung in hong zahpih in, mi khempeuh in hong nuihsan zong in!

Hong it,
Dimno’ Pa
December 13, 2012