Dependency Life (Mite tung’ a kinga-den ngiat, nuntaakna)

Dependency Life (Mite tung’ a kinga-den ngiat, nuntaakna)

Cikciang paak in, ih gahding aa, khaicii hoih suakding ih hiam? Theigah bang huut in, vatui bang-in a vansap bekbek hi liang dending maw?

Nungkum September 18 ni-in, Scottish Independence Referendum ah ‘No to Indenpedence’ ci-in Scottish mipi a tamzaw in, vote a hong pia khia uh hi. Pawl khat te’ genna ah, Scottish te’n independence sang in interdependence lungulh zaw uh a hih man’ ci-uh aa, pawlkhat leuleu in, interdependence sang-in dependency a hih zawk ding’ lunglau huai ci uh hi.

Independence cih ciang, kuama tung kinga lo, kuama khutnuai ah omlo, kuama etcik kullo Suahtaakna cini.

Interdependence pen, ‘suangpi suangneu in thek’ cih ciangbek hilo-in, khat leh khat kihuai leh kinuam-tuam ciat’cih ding a hihi. A neu a lian ci-lo in, liangko kikim-in, a nungta khawm thei te’n nuamsa pen uh hi. United States of America bangdan cini. Ahizong, kipawl khawm ci-napi’ na khempeuh ki vompi sahawm den leh bel khasiat huai thei hi. Saipi in keelmawl pih leh keel in thuakzo den ding maw? cihthu hongsuak thei hi.

Zomi te zong,tu-ma kum60 val lai-in interdependence lunggulhna tawh kikal suan in, British Empire pan ki paikhia mah leh, ‘Hakai pahtaak lungheng’ ciding maw? ‘Gallu kihta galutuak’ cih khawlmun khat ih tungkha mawk aa, tudong mah, tua khawlmun ih nusia zo nai kei hi. Dependency Life ah lungmang in, mit-hak napi, khua ih munuam nawnkei aa, mi hehpih ding muang leh lam-en in, khutdawh ngen niloh in ih om hi.

Dependency cih ciang in, midangte huhna kisam den, huhloh phamawh den cihna a hi-ding hi. Nuntaakna neikhat hi leh, kepkep leh khoikhoi kul, a hih kei leh, zatui zaha lo a, nungta zolo ci ni.

Nu gilsung aa ih om a kipan, na khempeuh ih nu tung kinga hi napi’ nuamtah ci-in paikhia ngeikei mawk le’ng mihing kipiang loding’ bekthamlo in ih nu’ nuntaakna mahmah lauhuaisak ding aa, ahing maw, a simaw in ih kilaakkhiat kul teeiteei a hihi.

Ih suah khit nangawn in zong, nau-ngek an bekbek mah tawh kivak in, antaktak nengei kei mawkle’ng mipi-cing suahham mahmah ding hizel hi. Nau ngek bang-in, anne zel, kimawl zel, kapzel in, paitaktak lo-in, lampai kisin denkeeibek leng’ mipi-cing kisuak hak ding hi.

Khaicii zong kivawh napi, leisung ah eklaiza kicing takin om lel ci-in po khia kei mawk leh singkung hong suak ngeilo ding hi.

Singkung paakkungno te hong po-khang khia-na pi’n, paaklo in, gahkei zel leh zong, a cii kizom theilo ding aa, a cii-mang’ hongsuak lel ding hi.

Zomi te zong, ni khat ni ciang ih gam ih lei ah, gahpha aa, dependency pan independence cih mipi-cing minam’ nuntaakna ih ngah nang’ tung Pasian in hong siam ta hen aw.

Nantal’suan