Democracy cih mipi’ deihna bang ki-ukna hilo ~ Pau Khat Suan

Democracy cih mipi’ deihna bang ki-ukna hilo ~ Pau Khat Suan

(Lai a vek a simlo pi in ong comment kei in) Democracy ki-uk, ki makaih, ki nungzuih zia i cih pen “mipi’ deihna bang a ki-ukna” sa kha zel hihang. A taktak in tua hilo hi. “Mipi’ ading a ki-ukna” hibek hi.

Mipi in tehkak 2/3 sung pan a teel, a tamzawte’ vote tawh makai ding a a kiteelte’ makaihna, vaihawmna leh ki-nungzuihna ahi hi. Tua a kiteel makaite, mipi’ tangmite in vaihawm leh nasep ong makaih ding ahi hi. Mipi’ teel makaite in mipi’ ading (mipi’ deihna hithei/hilo thei) a ong makaih ding, na ong sem ding cihna ahi hi.

Ahih hang, tua ong makaih ding tangmite (MP/MLA cihte) pen, kum 5 ciang khatvei (Kawlgam, India cihte ah kum 5, USA hileh kum 5) mipi in enkik, teelkik ahihman in mipi’ ading a a nasepna uh mipi’ lungkimna ahih ding, mipi’ kisap leh lunggulh asep ding uh a thupi leh a kisam ahi hi. Mipi in i teelsa i tangmite (MP/MLA cihte) in mipi’ ading nasem a sak kei a, mipi’ kisap leh lunggulh a sepna uh lungkim huai asak kei leh midang teel ding hi.

Tua ahihman in tangmi a ut laite in mipi’ ading, nasep hanciam a, mipi’ aw ngai in mipi’ deih leh lunggulh kankhia semkhia ding uh ahihman in a tawpna ah mipi leh gam hampha ding ahi hi. Kiteel laitak thu tampi gen luakluak napi kiteel khit ciang bangmah a taksuak lo, a semlo, mipi’ aw a ngailote bel ahih leh mai kiteel kik ciang emsa suak cihding ong hiding hi.

Mipi’ deihna leh lunggulhna, lam-etna cihte a thusim lo, ama’ ngaihsutna bang bek a a painuam makai pen makai gina hilo, mipi’ tangmi ding a a deihhuai hetlo makai hi a, mipi’ deihna bekbek ngai lua liang leuleu a mipi’ cihbang bekbek a a kihei liamliam, mipi’ ading a ama’ ngaihsutna leh deihna banghiam cih zong a om mello makai zong ngaihsutna mel neilo, a pil zolo, aciim zolo, kifit zo taklo tangmi hi zel hi.

Tua ahihman in….
1) kiteel hun ciang mipi in i teel i tangmi kua hi a, bangci bang qualification nei a, bangci bang lungsim nei hiam cih pen ( a mimal mahmah ) i theihtel sawm ding thupi mahmah hi.

2) Kiteel mankhit ciang mipi a tamzawte in a deih, teelcing tangmite pen ei’ teel ahi kei phial zong in i tangmi hi ci a 100/100 i santheih ding thupi mahmah hi. Telcing tangmi mimal a i zahtak kei phial zong in, mipi a tamzaw’ deihna pen a tawmzaw in a zahtak ding thupi a, a tamzawte in zong a tawmzawte a thupi ngaihsut ding kisam veve hi.

3) Teelcing tangmite in zong, a mah a teello mipite’ tangmi mah a a kingaihsut ding kisam hi. Amah a teelte’ tangmi bek a a kingaihsut leh mipi’ tangmi hithei nawnlo a, mi pawlkhatte’ tangmi bek suak ding hi.

4) kiteel hun ciang candidate khat peuh in u le nau vai, beh le phung vai, khua le tui leh pau le ham cihpeuh tawh amah na vote ding ong nget khak leh tuabang mite peel pah lian in. A ngaihsutna toi lua a, mipi OR gambup huam zo ngeilo ding, gambup level ah nasem thei ding quality neilo cihna hipah hi.

Democracy ki-ukna i cih, mipi’ deihna bang a ki-ukna hilo a, mipi’ ading a mipi’ teel tangmite’ makaih vaihawmna tawh ki-uk ki-makaihna ahi hi.

I teel tangmi kua hiam cih thupi a, teelcing tangmite’n a mipi a etkik ding, mipi’ aw ngai in mipi tawh ton a, mipi’ ading ngimna lianpi tawh mainawt a a makaih ding kisam hi.

Pau Khat Suan