Dem zo nai kei mawk hang ei! ~ Zomi Quavadis

Dem zo nai kei mawk hang ei! ~ Zomi Quavadis

Tutung in US President dinmun akituh nihte Final Kinialna ka phone sungah download in ka na ngai kha hi. Tua khit ciangin New York Archdiocese a Catholic Siadawpipa in Charity Dinner a vaihawmna ah Candidates nihte leh US gam a milian tulkhat kisam in, tua ankuang umkhopna sungah Candidate nihte thugen kikna leh Cardinal Smith thugenna teng zong limtak ka na ngai hi.

Hih Charity Dinner ah numei naupang a cimawhte huhna ding leh laptohna dingin USD 6 Million val kingah a, hih USD 6 Million val pen US milian tulkhat te ankuang umkhopna pan zan khat thu in a kipia khia ahihi. Hih ankuang umkhopna pen kum sim in New York Archdiocese panin a kivaihawm hi in, tutung pen a 30 veina hi ta hi.

Tu ciangciangah Hillary adingin lamet om zaw pek hi. A beisa hunte ah a lawhcinna om mel kei mah taleh numei khat ahihna tawh a kam tamin Lesbian, Gay, Bisexual leh Transexual (LGBT) teng a huam banah gamgii om lo (open-border) zah dongin suakta taka sumbawl theihna cihte ultung sak mahmah hi. A pasal Clinton pen US President na hi ngei khin banah amah ngiat zong US Politics sungah kum tampi na kidiah khin in State Secretary a sem den khat ahihi.

Tua ahihmanin Hillary pen thugen leh thuzuun dan siam in, a dang zong naal zaw pek hi. J. Trump leuleu bel mihau Billionaire khat ahih mah bangin kuamah maitang zahtaak nei lo in, a ut bangin pau phial suk gawp lel a, khat veivei a hai pau tawh kibang liang hi. Himah leh ama dinpih thute tel mahmah hi. “Thumvei kinialna sungah kei a lel ka hihi. Ahizongin US kumpi ding kiteel nai lo hi. Ni 19 om lai hi” ci ziau lel hi.

Bangbang ahizongin hih President kituh tegel thuak zawhna pen thupisa ngiat ingh. Mite maiah ek nam liangin kiko in kigensia uh a, a kicinlahna teng uh kikawk in kipholaak sak ngekngek uh hi. Ahun laitakin a kithat nuam bang phial liang uh himahleh hun bei ciangin maitai takin kihopih kik lel uh hi. Thusia lasia tengin innpua ah tonpih se lo uh a, mimal kihuatna in zong nei lo lel uh hi. Mipi in amau zaakna leh muhna tungtawn in kumpi dingin eigeel lakpan a muan zawk uh hong teel hen a ci uh hi lel hi. Thupisa ingh. Mangkaangte bel ei Zomi ten dem zo nai kei mawk hang ei! A pilna uh ih etteh ding tampi om lai hi. Zomi Quavadis