India, New Delhi ah innkuan mi 10 tak innsungah aki khailumsa in kimu

India, New Delhi ah innkuan mi 10 tak innsungah aki khailumsa in kimu

India, New Delhi khuapi sung aom innsung khatah innkuan mi 10 tak aki khailumsa in ki mukhia cih Reuters pan kiza hi. Sunday ni in New Delhi, Burari vengsung aom innsung ah aki mukhia ahihi.

Tua mi 10 tepen amit ki tuamcip in, akhut uhzong anunglam ah kilehhensa in aki khailum uh ahihi. Tua mi 10 banah adang mi 1 zong asisa mahin sualtung ah kimukhia a, avekpi in mi luang 11 tak asisa in akimukhia ahihi.

Tuabangin innsung ah aki thatlumsa in akimu misi 11 tepen pasal 4 leh numei 7 hi a, naupangno Teenagers zong kihel uhhi. Burari vengsung aom a innvengte’n hihte innkuan avekin asisa in om cih Sunday zingsanglam in amukhiat uhhi ci’n Police te’n genkhia uhhi.

Media te genkhiatna ah sualtung ah asi khatlobuang, adangteng pen inntung Ceiling zawltung panin akikhaisa in asi uhhi ci’n genkhia uhhi.

Police Official te’n agenkhiatna ah hihbangin innkuanbup aki thahlupna ahang taktakpen kitheician nailo a, aki limkansan mahmah laitak hi cihciangbek genkhia a, athu akician in bangmah pulakna neinuam nailo uhhi.

Nungdiak June 18 ni inzong Burari Market ah migilo Gang te kitawnggawp uh a, inn khatlekhat ki haltumsakgawp uhhi. Tua buaina hanginzong mi 3 takin sihlawh in, adangzong mi 5 bang liam uhhi. Tuazawh asawt hetlo, kalnih khitciangin Burari vengsung mahah hihbangin mi tampi kithahlupna apiangkik leuleu ahihi.

Police te’n hih migilo te gamtatna “Gang War” nihte pen kizopna om ci’n genkhia uh a, amakaipi pen 2013 kumpek in buaina apiangsak zelzelkhat kici hi.

Video: In a shocking incident from Burari in Delhi, 11 members of a family were found dead inside their home. Some of the bodies were found hanging and other with their hands and legs tied. Out of the 11 dead bodies found, 7 were female and 4 were male. No suicide note has been recovered from the house and Delhi police is investigating all possible angle.

https://www.youtube.com/watch?v=XsjV4uilux0

Hih buaina apianna innsungah thagum tawh kibuluh in akilut “Forced Entry” cihbangzong ki mukhialo a, migilo te bangci bangin innsungah luttheihiam cihzong lamdang kisa hi. Tuaban ah misiluang te aki sitcian cianginzong thautawh kikapliamna cihbang bangmah omlo cihi.

Avengsung aom meltheih khatinzong agenkhiatna ah hihte innkuan pen amauleh amau aki sihbawl hipeuhmah loding hi. Saturday zanlam inzong kaki mulai uh a, bangmah lumkhamna neihtuak hetlo uhhi ci’n genkhia hi.

Sualtung ah asisa in akimu pen kum 70 aphakhin nupikhat hi a, tualo khempeuh inntung Ceiling zawltung panin akikhaisa in asi uh ahihi.

More: India ah pasal khatin anu asihzawh kum 3 sung Freezer sungah kemcip

Hindustan Times Newspaper te genkhiatna ah hih innkuante pen hih innsungah aomzawh uh kumtampi sawtkhinta hi. Kum 20 bang valkhinding hi. Ahi zongin aomna inn uhpen amau neihsa hilo in, mihau Businessman khat ii neihsa hi a, tua Businessman ii naseppen Plywood Shop leh Dairy cihte kibawlna aneikhat cihi.

Police official Rajesh Khurana in Reporters te tungah agenkhiatna ah hihvai pen limtak in kiuli panin sitcianna kinei in ki kankhiading hi ci’n genkhia hi. Sawltak #zomidaily