Deih teelna

Deih teelna

Leitung ih nuntakna, deihteelna tawh kinungta hi. Deihteelna in nisim naisimin, ihnuntakna uka, iteelkhialleh i nuntakna paikhiala, i hoih teel ciangin i nuntakna hoih hi. I teel ding thuthum kikum ni.

1. Anghuaina leh Paampaihna (Inclusivism-Exclusivism)
Nisim i nuntakna ah, Anghuaina tawh nuntakna in, nuntakna hoih ahi hi. Midangte pawlbawlin, it-in, thupisimin, pawlpihin nuntakding ahi hi.
Paampaih nuntakna in, amaubek thupi kisa-in, midangte lang bawlin, galbawlna ahi hi. Communist te’ lungsim puak hi a, amaubek thupi kisa hi.

Topa Jesu thu guipi khatin, ‘Galte Itna’ ahi hi. Anghuaina ahi hi. Tua ahih manin i mailam nuntakna ah, Anghuaina lam i teel dending thupi hi.

2. Aisa Lungsim (Scrab mentality)
Kuangsung khatah, Aisa hon koih leng, akahtoh sawm masa sa, anuai aten lehkaih den hi. Missionary khatin Philippines te lungsim pen Aisa lungsim ahi hi ci hi.

Kilaamto lo hi. Madawk ding, omleh kilehkaih den hi. Mailam ikalsuan nangah, hih Aisa lungsim nei lo-in, midangte huh, panpih, laamto lungsim iteel ding thupi hi. Midangte thapiakna, laptohna in a lamtote, athapiate a ding thupha nahi zawsop hi.

3. Mawhmaisakna Lungsim (Forgiving Spirit)

American te’n makai-in, gamlian teng kipawlin, Communistte Vietnam gamsung do uh hi. Kum 19, kha 5, kaal 4 leh ni 1 sung kikap uh hi (1955-1975). Mi Tengli leh alang val in sihlawh hi. Vietkongte buknateng susia uh a, singteh teng za (dioxin) buakin pulh mangsak a, buh leiteng keu mang sak hi.

Vietnamte in suahtakna ngahin a gamuh puahding hong kipat ciang in, Americante mawhna maisak ding tawh kipan uh hi. American te bel uh a,agamuh manlangtakin khangto-in World Trade Organization ah kihel zo ta hi (11 January, 2007). Asia gamah akhangtopen gamkhat hita hi. Kawlgam ah zong Hotel lam uh hi. Hih khantohna pen mawh maisakna pan kipan hi.

I mailam khantoh nang, idaupai nang, mawh maisakna iteelden ding thupi hi. Mawhna ciapteh denna in, imaa bingsak hi.

Tua ahih ciangin, imimal nuntak nang, minam nuntak nang, gam nuntak nangin, Anghuai lungsim nei ciatta ni. Madawk ding, gualzo ding a om ciangin, lehkaih kik lo-in, thapia-in panpih ni. Mawhna maisakna lungsim tawh nungta-in, ideihteelna maansak ni.

Rev. Dr. Thuam Khan Thang