Dahna Pulakna : Mangpha Pa Thang Kap Khai @ Khaipi

USA gam, Georgia State, Atlanta khuapi a teng Pa Thang Kap Khai @ Khaipi, Kum 33 (Naulak beh) in abeisa May 22, 2016 ni zingsanglam nai 4:30am hunin Thaguilam natnatawh atenna innphualzang panin mual ong liamsanta cihthu izakmanin Zomi Innkuan USA kipawlna in nakpitakin kidahpih, kilainatpih hi.

Pa Thang Kap Khai pen Zogam, Tedim uksung, Anlangh khuami, Sakollam veng, Tedim khuapi ateng Pa Pau Ngaih Suan leh Nu Man En Cing ten Tapasal 5 leh tanumei 3 nei-in amau unaulaizom 8 sungpanin atumpen 3 na leh unau Pasal lakah anaupen ahihi. nuntakkhuasakna anuamzawding lunggulhna tawh abeisa 2011 kum in USA gam ongtung ahihi. 2011 kummahin a itmahmah azi Nu Ciin En Lun @ Buahpi tawh pumkhatsuakna ongnei uhhi.

Pa Thang Kap Khai pen USA leitang tunga teng Zomi khat ahihna tawh kizui-in ZIUSA kipawlna thukhun ombangin Zomi sungah unausanggam khat, laizomkhat hihna lainatpihna lahna in Zomi Innkuan USA kipawlna in Paakkual khattawh Mangpha khakna kineiding hi.

I sanggampa Khaipi tawh a nunungpen hunzatkhopding pen ongtungding May 25, 2016 (Wednesday) ni sunnung 12:00pm hunin Atlanta khuapi a Zomi SDA te kikhopna Biakinn, 3567 Covington Hwy, Decatur, GA 30032 ah Pr. Suan Lian Mang in SDA pawlpi ngeinazui-in ong makaihdinga tuakhitciangin Melwood Cemetery, 5170 E Poncedeleon Ave, Stone Mountain, GA 30083 ah daitansakna/Vuina kineidinghi.

I sanggampa Khaipi ongnusiatna hanga adah akap Inn leh gam muntuamtuam pana alunglengkhuangai pianna nulehpa sanggamteng leh khuapihtuipih tanaumeltheih akuamapeuh adiakin a nusiat a itmahmah azi Nu Ciin En Lun @ Buahpi tungah ibiak Vanglian Pasianin amakiangpana ongpai a khasiangtho hehnepna bucing ongpiaksak henla aluang khituite ong nulsakin lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.

Genbehna : Sihvuinidong nitaksimin anuai a Address ah Atlanta bulphuh Zomi Pawlpi tuamtuampanin siapite makaihnatawh hehnep hunbawlna kineidinghi.

Pa Khaipi & Nu Buahpi te inn : 782 Jolly Ave S, Apt # E-9 Clarkston, GA 30021

Dahpihna lianpitawh
Executive Committee
Zomi Innkuan USA, Inc.
May 23, 2016