USA gam, Indiana State, Indianapolis khuapi a teng Pa Pau Thual @ Pau Khan Mang, Kum 44 (Gualnam beh) in abeisa August 6, 2016 ni zan nai 10:00pm kimpawlin Tuikia tuahsiatna hangtawh mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.
Pa Pau Thual pen Zogam, Tonzang uksung, Zampi khua ateng Pu En Khaw Thang (Late) leh Pi Don Khan Zen ten tapasal 4 leh tanumei 3 aneihna sungpanin a mahpen a nau tumpenzom ahihi. a it mahmah a zi Nu Awi Zen Niang tawh Pasian thupha Tapasal 3 leh Tanumei 3 ongnei uhhi. nuntakkhuasakna, sumzon paaizonna anuamzawding lunggulhna tawh abeisa 2014 kum in USA gam ongtung ahihi. A zi atate zong amakiang a paidingin zumlai kisam tuamtuam, zumlam a vaandingin Yangon khuapi ah a omlaitak, innkuan kimtaka kimuhkhopding ngaklaha a omlaitak uh hicibanga lametlohlaitak ong nusiatvatmawkpen lungzinhuai mahmah, na kisakpih mahmah ciat hi.
Pa Pau Thual pen Indianapolis khuapi bulphuh Zomite kipawlkhopna Zomi Innkuan Indianapolis ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Active member khat ongsuahna uhtawh kizui-in ZIUSA Genvai thukhun ombangin Pa Pau Thual pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi. Hih akipiakkhiat luangphamna sumtepen USA gamsung muntuamtuampana ZIUSA Genvai thukhunpom pawlmi 7,260 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.
I sanggampa Pau Thual tawh a nunungpen hunzatkhopding tawh kisai ongtungding August 12, 2016 (Friday) ni-in Singleton Funeral Home 77602 Madison Ave, Indianapolis, IN 46227 ah 12:00pm to 1:00pm kikalpen Body Viewing/visiting hun hiding 1:00 to 3:00pm hunsungpen Grace Zomi Baptist Church, (GZBC) Pawlpi in hanthotna, hehnepna vaikhempeuh ong makaihdinga tuakhitciangin Round Hill Cemetery 5235 S Meridian St, Indianapolis, IN 46227 ah daitansakna/Vuina kineidinghi.
Isanggampa Pau Thual ongnusiatna hanga adah akap, alunglengkhuangai pianna nulehsanggam laizomteng, khuapihtuipih tanaumeltheih akuamapeuh adiakin a nusiat a itmahmah azi Nu Awi Zen Niang leh a tano 6 teng tungah Meigong tagahte a nusia ngeilo, a maute pasal/Pa dinmun ah a pangden ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.
Dahpihna lianpitawh,
Executive Committee
Zomi Innkuan USA, Inc.
August 11, 2016
Comment piaknop aomleh...