USA gam, Oklahoma State, Jenks/Tulsa khuapi ateng Nu Cing Nuam Kim (Don Za Ciin @ Ciinbawi) Kum 45 (Tombing beh) in abeisa December 11, 2016 ni zingsanglam nai 9:30 AM hunin atenna Jenks/Tulsa khuapi panin Tuapsung damlohna tawh mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.
Nu Ciinbawi pen Zogam, Tonzang uksung, Tuimui khua ateng Pa Kim Khaw Thang leh Pi Awi Niang (Tombing beh) ten ta 8 neihna sungah a neulampan a 3 na a hihi. A it mahmah a pasal Pa Mung Khan Khual @ Cin Lian Khup, Thalmual khuami, Tedim, Sakollam a teng (Milun beh) tawh nuntakhuasakna anuamzawding lunggulhna tawh abeisa 2012 kumin, Tulsa khuapi, USA ongtung uh ahihi.
Nu Cinnbawi te nupapen Tulsa khuapi bulphuh Zomite kipawlkhopna Zomi Innkuan Oklahoma ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai ah Active member khat ahihna uhtawh kizui-in ZIUSA Genvai thukhun ombangin Nu Cing Nuam Kim @ Ciinbawi pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi.
Hih akipiakkhia luangphamna sumtepen USA gamsung muntuamtuampana ZIUSA Genvai thukhunpom pawlmi 8,284 tekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.
I it mahmah Nu Ciinbawi tawh a nunungpen hunzatkhopding pen ongtungding December 14, 2016 ni 1:00 PM hunin Tonu Maria Siangtho Lungtang Biakinn 1541 E Newton Pl, Tulsa, OK 74106 ah Rev. Fr. Robert Kimpu in Catholic ngeina zui-in vaikhempeuh ong makaih dinga tua khitciangin Calvary Cemetery, 9101 S. Harvard Ave, Tulsa, OK 74137 ah vuina daitansakna kinei tosuak ding hi.
Related: Rakhine galkap leh Kawlgalkap te Paletwa ah kikap, mi 10 si ~ ZD
I it mahmah Nu Ciinbawi ongnusiatna hanga adah akap, alunglengkhuangai pianna tuunnu leh pianpih sanggam laizomteng, khuapihtuipih tanaumeltheih akuamapeuh adiakin a nusiat a itmahmah a Pasal Pa Khup tungah ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.
Dahpihna lianpitawh,
Executive Committee
Zomi Innkuan USA, Inc.
December 13, 2016
Comment piaknop aomleh...