Covid-19 Update VII: White House pan theihhuai pawlkhat (March 26)

Covid-19 Update VII: White House pan theihhuai pawlkhat (March 26)

Covid-19 Update VII: White House Press Briefing pan atheih huai thu pawlkhat – (March 26, 2020)

– President Trump in G-20 makai te tawh meeting abawlna thu hong pulaak aa, leitung makaipi te tawh Covid-19 natna do (control) theih nading kikupna thu pulaak hi.

– President Trump in “Coronavirus stimulus relief package” pen Senate ah a pass na uh alungdamna thu hong pulaak aa, House ah zong pass ding upna ka nei cih pulaak khia hi. Tua relief package pen zingciang House ah ki vote pan ding aa, House in a pass khit zawh ciang President in sign thu in tua bill pen kizang thei pan ding ahi hi.

Tua hi in Facebook leh social media tung khawngah pawlkhat ten direct payment kihawmkhia ta ding, tua zah kingah ding ci aa agen khiat te uh pen bangmah kician tak tak nailo ahih manin Kumpi thu nei te thu suah te bek mah i up ding hong thupi mahmah ding hi.

– US Federal Kumpi Agency te ahi National Institute of Health (NIH) leh FDA ten private company te tawh kipawl in Covid-19 treatment, Zatui leh Vaccine te asawt loin bawl khiat, zat khiat, hawmkhiat zawh ding ahanciamkhopna thu President Trump in genkhia hi. Vaccine pen Phase 1 na bek kiman pan aa, Phase 3 ciang test bawl kul ci in kum khat val bang sauvei ding ci uh hi.

– President Trump in Sen (China) President pa tawh tu ni tak ka kiho dinguh cih thu pulaak aa, Covid-19 thu zong kikup ding vai genkhia hi. Sen te ii akhahkhiat Covid-19 virus data te zong ka um kei ci hi. Thu thei Expert te genna ah US ahih leh virus data pen maan takin kikhum leh taangko khia ahih manin Sen te sang zong atam zawk leh lamdang lo hi ci uh hi.

– Vice President Mike Pence in Stimulus relief package pan nasem innkuan te direct payment piak ding pen innkuan 4 apha te $3400 ciang ngah dinguh cih ciang pulaak aa, a kicing (detail) in pulaak khia nailo hi. Hih sum te pen House in a pass leh bek kihawm thei pan ding ahih manin thu ngetna ah hel ciat ding hi.

– Vice President Mike Pence in Stimulus relief package sungah “Small-business retention loans” acih sumbat pen company ten la thei dinguh aa, tua loan pen company nasem te ii khasum (payroll) dingin kizang dinghi ci hi. Restaurant, hotel aa kipan adang business te akikhak (akhawl) uh hangin a nasem ten na asep kei uh hang zong kha sum ngah suak thei dinguh ci hi.

Tua hi aa, mitampi in phattuamna ngah ding ahih manin hih stimulus relief package hong pass dinguh thupi mahmah hi. Tua loans te pen ala company ten Kumpi te tung piak kik kul nawnlo ding ci hi.

– Vice President Mike Pence in tuni in FDA ten point-of-care test acih Covid-19 test na athak khat phalna pia (prove) ta uh ci aa, tua pen Siavuan ten zong zang thei ta ding in, result pen minute 15 sung kithei ta ding ci hi.

– Tuni US gam sungah Nasep nei lo ci aa a genkhia (Unemployment job less claim) pen 3.3 million om ci aa, ahi zong in Walmart, Amazon aa kipan company tampi in zong nasep tampi sam kik uh hi ci in Vice President in genkhia hi. Stimulus relief package sungah zong Nasep nei lote aading benefit kihel aa, i om na state ciat ah zong Unemployment benefit kisiau thei hi.

– Tuni in US ah Covid-19 natna nei mi 85,377 leh asi mi 1,295 pha ta aa, leitungah Covid-19 natna nei atam pen gam hi ta hi. I omna leh i pai na ciat ah social distancing zang tek in i kidawp ciat ding thupi mahmah hi.

Theih ding: Zani ZNTV pan hong taangkoh khiat mah bangin hih Covid-19 thu tawh kisai pen CDC, White House leh Federal/State Kumpi te thu taangkohkhiat leh suahkhiat sak te bek mah i up ciat ding leh tulai tak fake news tam pian ahih manin akuamapeuh i kidawp ciat ding thupi mahmah ding hi. Thomas On Sian Mung (Thomas Mung Guite) Washington D.C, March 26, 2020.