COVID-19 pan kidal nading ~ Nok Kam

COVID-19 pan kidal nading ~ Nok Kam

Hih natna a omna gamte-ah a ngah mi ni 6 halin a zah nih (double) khang den hi, ci-in mipilten mukhia uh hi. Kidalna, damna zatui om nai lo ahih manin kidal kikep nading zatui hoihpen in midang tawh kihalna/midang tawh kikakna (social distance) ahi hi.

Mi tawh na kikak manin nang le nang a kidal bek na hi kei a, na theih ban loh mite nangawn a dal, a gumkhia na hi hi.

Midang tawh kikakna banah;

• 1. Khut sil den ding;
• 2. Midang tawh pi (feet) 6 halin kiho ding;
• 3. Khut sil siang masa loin na mai lawng lo ding;
• 4. Kongkhak khutlet a kipan khutlet nam khempeuh siangthosak ding;
• 5. Computer le cellphone siangthosak ding;
• 6. Mipi omna pel ding;
• 7. Ansai (restaurant) pai lo ding;
• 8. Kimawlna tuamtuam le gym pai lo ding;
• 9. Sum na lawnkhit sialin khut sil siang ding;
• 10. Anteh theipuam na lawnkhit sialin khut sil siang ding;
• 11. Khual zinna vanleng, meileng, bus tuan kidawm ding;
• 12. Party, birthday party, wedding party bawl lo ding, pai lo ding;

Zomite aw, hih hun in, Upna kize-etna hi lo a, thumanna (obedience) kisittelna hun hi. Hangsan kituh hun hi lo a, pilvang kituh hun hi. Eile-ei bek kikhual hun hi lo a, midangte khual hun hi. Ei i nat sese loh hangin natna lungno a hawmsawn (transmitter) kisuak thei hi.

Nangma hangsanna le thuman-lohna hangin nang na thuak pen ahi ding mah hi a, nang hangin midangte in a thuaklawh khak ding lauhuai hi. Nok Kam