Constructive criticism: Kilamna pia thukupna ~ Rev. Fr. Damian Dal

Constructive criticism: Kilamna pia thukupna

Constructive criticism – Kilamna pia thukupna in nasepna, vaihawmna, nuntakzia te leh kizopna cihte khempeuh ah akisam pha penpen ahihi. Kilamna pia thukupna i cih in, bang dan thukupna hi a, koi cidan in tua bang thukupna kipia dinghiam cih thu zong atheih huai mahmah thukhat ahihi.

Kilamna pia thukupna i cih in, nasepna khat, vaihawmkhiatna khat, thugen khiatna khat peuhpeuh tungah, asia apha khentel in, banghang kisem, banghang kisem lo, banghang gen, banghang kigen lo, bangcibang in kua tengin vaihawm a, banghang in tua ci vai hawm cih te a kipan, thuzung thuteng kantel in, tua thuzung thuteng te leh apiangthu, akisemkhia, akigen khia thu te khinkhai khitciang in, asia apha tawh kisai in, genkhiatna ahihi.

Constructive critism – Kilamna pia thukupna anei nuammi khat in, akupding thutawh kisai in, kantel na, sintelna, thuzung thuteng leh apiangthu te kikal ah khinkhai theihna leh, akisem nasep, akigen khia thu, akivaihawm thu te tungah ahun, amun leh nuntakzia te ii zia le tong (time, space and situation) te etkak ding hi.

Kilamna pia thukupna in mawhsakna awsuah, pauzia te leh, langpanna lim le mel apua kammal te (oppositional tones) nusia in, tha apia, akisangsiam thei zaw kammal le awsuah te tawh genkhia, gelhkhia in paukhia ding hi (with positive tones and friendly and supportive way of speaking).

Eimi te sungah constructive criticism – kilamna pia thukupna anei thei, apia thei kitam nailo hiding in ka lamen hi. Athu in, thukan ding leh laisim ding tawhkisai in, tha i nei kei a, genna ding lamah i thagui i tha tangteng i va phumkha ahih man hiding in ka lamen hi.

Kilamna pia thukupna in kamzol, kamkhum leh awsuah te tungah tampi kinga hi. Tua bektham lo in, mite zia le tong, hun le mun te ii kilamdan zia leh, mihing te ii nuntakzia zia le tong te tungah avei atak, athuk asang, atom asau, avom akang ettheih dingzong athupi penpen khat ahihi. Tua te lo in, mikhat peuh in, kilamna pia thukupna aneihtheih ding haksa mahmah hi. Hih thu hangin, gamvai te ah diplomatic skills – thuzopzia siamna ci in, kisin tangtang hi.

Kilamna pia thukupna in diplomatic skill – thuzopzia siamna ahihi. Kilamna pia thukupna i cih in, ahoihzaw, aphazaw, akilawmzaw leh ei deihna tawh akituak zaw thu le la, sep le bawl khat hongpian nangin, midangte lungsim nawngkai na piangsak lo in, gending thu thei tel in, gen ding hun thei tel in, gendan ding thei tel a, zatding kammal te teelsiam na ahihi.

By Rev Fr Damian Dal
Leuven, Belgium