Cingnote lenna gam khen lam ah – 1 ~ Hau Za Cin

Cingnote lenna gam khen lam ah – 1 ~ Hau Za Cin

Cingpi te lenna gam nusia in Cingno te lenna gam khen lam ah ZOGAM THAK om hi cih ka zak ciangin ka maitang beek va lak ning ciin ka lengkhia a, lungzuan zatam sialna ding ahi cih ka theikhol kei hi.

Narita Airport ah nai nih sung ka tawlngak tak ciangin ka pai masak lai tawh kibang nawnlo hi cih ka phawk a “nungkaih” a vei zaw ka hiam aw ka ci hi. Ka pai masak lai in Narita nusiat mengmeng ding ka lunggulh a, tu tung in bel a ban kalsuan ding sangin kilehkik ding a utzaw tawh ka kibang hi.

Tua sanga lungzuanhuai zaw bel Narita tun ma, tua ni zingsang phalvak tunga Changi airport ahi hi. Aw! la kik thei leng maw…….. amah lah maitai, lah dah, airport gate pel in a sung lut leng mel kimu thei nawnlo ding cih gen kikkik kullo a theihsa…… moto ah kikhak lungzuanhuai, tembaw ah kikhak lungzuanhuai zaw thamtham (tembaw sawtpi kigalmuh thei ahih manin) cihte migen ka za ngei a, vanlengtual ah kikhak a lungzuanhuai dan akigen ka za ngei kei hi.

Ka kimaitaisak hang ka lungsim tawng ah lungzuanna meipi zinga, guahpi zu bangin ka lungsim khitui luang hi, ahi zongin ka mel ah a kidawk ding ka deih kei a, ka ip zawh zah in ip in ka siamtawp in ka nuihmai sawm hi. Ahi zongin lungzuanhuai hi. Khuasung khata lengkhawm nangawn kimuh ding khialah in paulap namkim tawh kimuh theihna ding lampi sial uh a, tuabang a tomvei kimuh pak nangawn leitung nuntak hun sungah khangno hun sunga a nuam penpen khat ahi hi (ka lawmpa’n ci).

Changi airport gate ka lut khit ciang a maitai mel in hong hehnem a, a kawngciang a pha lo a sam kikhai ning niang huihkhi sem in leng diamdiam hi. A powder gim kiza nawnlo a, lungzuan meipi kai bel kibehlap deuhdeuh hi. Ka nung ah hong sawn omlo a, ka mai ah hong kai zong om tuanlo in Sakhi Suaklu zuan ding khuangai bangin ka ding khi khe lel hi. Ka gal et a, amah zong hong gal et a, zingsang gamdai huih nung hiauhiau lak ah hun in hong ngak vet lo hi. Ka khut veilam ah ka bulh Made in India kici Titan Watch, India khuapi Guwahati ah ka muh khempeuh lak pan a hoihpen in second khat zong hong ngak lo in tawlnga lo in na paipai ahih manin HUN in hong ngaklo a, ziakai kha ding ka hih manin ut in ut takei leng ka khepi muk lam ka manawh hong kul hi. Nang hilecin na lawp tam?

Vasa lah ham nailo, zusa lah lum nailo, lungzuan lah guntui khang bang sa’n…… I khualzinna leitung pen hibang himawk ei, khat veivei!

…. (thu pawlkhat nusia phot leng) ….. le’nglen’g in a kigengen, ‘ngaih anglai’ zom ah a nuam bel a cih gam uh America, ZOGAM THAK zong a kici, “Topa ka muang uh hi” ci a tangko ngam, suahtakna leh kuamah kinawngkaisak lohna gam, van leh lei a bawlpa Topa in ka khe tawh hong sik sak a, a bawlpa lian si e maw ka ci hi. Topa hoih hi.

America hoihna leh a thupina, a liatna leh a khantohna, mite nopsak dan leh lunggulhtaak ahihna, leitungah vangam a kiciap kholhna, keima muhna ciangciang leh ka lungsima hong suak thu pawlkhat kong at nuam hi. (zop lai ding) Dr. Hau Za Cin (Phuitong Liim)