Cikciang lungkim ding? ~ Dr. Ngul Khan Pau

Cikciang lungkim ding? ~ Dr. Ngul Khan Pau

2019 kumin leitung ah billionaire mi 2,825 omin kiciamteh hi. Tuate sung panin Jeff Bezos, Amazon company phuankhiapa kum thum sung a kizomin ahau penpenin kiciamteh hi. A zi MacKenzie Bezos tawh nupa hong buai uh ciangin kikhen uh a, a makman (divorce settlement) in $36 million pia hi. Leitung bup ah zi makman tampen hi ding hi. India gam ah mihaupen Mukesh Ambani hi a, leitungbup mihau penpen 10 teelkhiatte’ sungah kihel hi. 2020 lockdown sung nangawnin ama summuhna kiam tuan loin nai khat sungin India sum crore 90 (tulza-khat ciang lakh khat, lakh zakhat ciang crore khat) zel ngah in kigen hi.

Billionaire tamna gam i gen ciangin China ah 799 om, USA ah 626, India ah 137, Germany ah 122, United Kingdom ah 119 le Russia ah 91 kici hi. Tua hangin Chinate’n leitung gam tampi lei kawikawi uh a, Australia tuipi kiang gam hoih tamzaw amau neih in kigen hi. Hih banga sum haute’n tuipi khawng kizuak hi leh leizo ding uh a, tua tuite ama tungah i lei ding kisam cihna hi. India khuapi Kolkata kizuak leh a leitang le a sunga om mihing inn le lote a lei zo ding mi om hi. A beisa kum 5 lai khawngin Bill Gates hauhna a kigen ciangin a sum neih khempeuh dollar khatin kisuaksak henla; tuate kizomin kipeh leh leitung panin khapi dong vial nga kivial zo dingin kigen hi.

Tuni i gennop pen mite hauhna thu hi loin mihing nuntakna ah bang ciang lungkim ding cih thu hi. Ka laibu simna William Barclay in a gelh Greek tangthu minthang khat enkhawm pak ni. Mi khat Midas kici Phrygia khua a teng mi in, sum bekbek thupisak a, summuh nading ahih peuhmah leh phatmawhsak nei lo kici hi. Ama’n ama pasiante’ kiangah ka khut thupha hong pia unla, ka lawn khak khempeuh “khamh” (gold) suak hen ci-in ngen hi. Tua pasiante’n zong tuan a cih leh ci-in a nget bangin na pia uh hi.

Amah zong hauh bekbek lungulhpa ahih manin a kiim a kianga omte hong lawng a, khamh suak ziahziah a muh ciangin nuam lua mahmah hi. Anne dingin tusuk a, a sikeu khamh suak, a nek ding buh le mehte zong kham suak khin hi. Tua laitak a tanu a pa kiang lamah hong taiphei a, a pa biang (check) hong nap (kiss) leh tua a tanu zong khamh hong suak hi. Amah zong khamh vive a neih theihna lungdamna sangin dahna-in hong nei a, a pasiante’ kiangah hong lakkhiatsak kik un, ci-in ngen kik kici hi.

Kicing i cih pen tawmkhat nei behlap lai leng kicing ding cih lungsim kinei ciat hi. Tawmkhat nei behlap leng kicing kici tuan loin tawmkhat mah kibehlap lai leh cih tawh kilungkim thei lo hi. Epicurus, Greek philosopher in hih tawh kisai a gen tawh kituak mahmah hi. “Mi khat na lungdamsak nop leh a neih behlapsak ken, a deihna huaihamna lakkhiatsak in,” na ci hi. Ama’n a gen behlapna ah, “Tawmkha zong kicing a sa ngei lote’n tampi hi leh zong kicing sa ngei lo ding uh hi,” ci hi.

Neih le lam tawh kisai thupi bawl mihaupa tangthu panin i Topa Jesu in a za mite kiangah, “Hoihtakin kidawm unla, na huaiham loh nadingun kikem un. Bang hang hiam cih leh bangzahta-in mi khat a hauh hangin a neihsa tawh a nuntakna taktak kicing zo lo hi,” na ci hi (Luke 12:15). Topa’ sung lungdamna in hauhna, nopna lian penpen ahi hi. Tua Topa sungah lungkim dingzia dong le teh ama’n hong hilh ding hi. I Topa Pasian in thupha hong pia ciat hen. Rev. Dr. J.M. Ngul Khan Pau