Christmas hunsung San Francisco ah thautawh mipi akapsawm pasalkhat kiman
USA, San Francisco ah Christmas hunsung buaina abawlsawm, akithawithawi pasal khat Federal Agents te’n Friday ni in mankhia uh cih AFP pan kiza hi. Tua buaina abawlsawmpa pen abeisa in tuigalkaplui “US Marine” khat hisawnsawn a, IS kici Islamic State Jihadist Group te ii gamtatna te thapiaksawm in amahzong akipan cimawk hi.
FBI Special Agent Christopher McKinney ii genkhiatna ah tua angongtat sawmpa ii aminpen Everitt Aaron Jameson kici a, kum 26 aphakhin, Tow Truck Driver nasep asemkhat cihi. San Francisco, khualzinmi atam mahmah phadiakna Pier 39 Tourist Spot munsanteng ngimbawl in buaina apiangsak dingin akithawithawi kici hi.
Tuipi geiah akidawh Pier khuampi tepen December 18 leh 25 kikalsung in apuakkhamthei Explosive vanpawlkhat tawh asukkhapsawm ahihi. Chritmas hunsung pen gitloh gamtat nading, Attack bawlnadingin alempen, hunhoihpen “Perfect Day” hi ci’n Federal Agents te kiangah genkhia cihi.
Tuabang in agamtat khitciangin ataikhiattheih nadingin geelkholhna “Escape Plan” cihbang kisam seselo hi, banghanghiam cihleh asiding in aki gingsa in ka omhi ci’n genbeh sawnsawn hi.
Tua a gitloh ngongtatsawmpa pen California, Modesto ah aom hi a, Wednesday ni in FBI Agents te’n amatkhiat uh ahihi. Tuapa ii omna innsung ah galvan thauvui thautang “weapon and ammunition” tampi ki mukhia cihi.
Hihpa pen abeisa 2009 kumin tuigalkap Marine Corps te kiangah galdozia Basic Training asinkhin khat hi a, “Sharpshooter” Rfle Qualification tawh sang aman, Graduate khat cisawnsawn hi. Rifle thaukap asiam mahmahkhat hi a, ahi zongin awmsung awmbing natna Asthma aneihlam genkhialo ahih manin, akitheih ciangin tuavai hangin zomsuak theilo hi.
Hihpa gamtatsawmna tengpen FBI thukan te khatin atheihkhiat ahihi. Tua angongtat sawmpa in FBI thukanpa pen IS migilo te ii makai in ngaihsun ahih manin, agamtatsawmna khempeuh kuppihkha cihi. Tuapan in FBI thukanpa’n athuteng theikhia in akiman ahihi.
More: Indonesia ah Christmas hunsung buaina abawlsawm migilo honkhat kimankhia
Hihpa pen California, Eastern District Court ah thu kibawl in, gampualam pan angongtat “Foreign Terrorist Organization” tetawh akizom, ahuh apanpih cihtawh kum 20 sungbang thong kiatheiding cih kiza hi. Sawltak #zomidaily
Comment piaknop aomleh...